Á myndinni má sjá torfuna (rauði liturinn) eins og hún birtist á skjám í brúnni á Polar Amaroq. Ljósm. af vef Austurfrétta.

Gríðarstór loðnuganga komin vestur fyrir land

„Við komum hérna í svakalega torfu. Hún er tæpar fimm sjómílur á lengd og þétt. Hún er frá kili og niður undir botn. Hér er sko alvöru vertíðarganga á ferðinni. Þetta hljóta að vera nokkur hundruð þúsund tonn,“ sagði Geir Zoëga skipstjóri á grænlenska uppsjávarskipinu Polar Amaroq í samtali á vefsíðu Síldarvinnslunnar og sagt var frá á vefmiðlinum austurfrett.is í gær. Polar Amaroq landaði fullfermi af loðnu til frystingar í Hafnarfirði á mánudag. Að löndun lokinni ákvað Geir skipstjóri að kanna hvort loðnu væri að finna í Jökuldýpinu norðvestur úr Garðskaga. Hann þurfti ekki að leita lengi. „Við erum nú að mæla þessa risalóðningu og síðan ætlum við að svipast frekar um. Þessi ganga hér verður væntanlega komin inn á Breiðafjörð um helgina og mun líklega hrygna þar í næstu viku,“ sagði Geir.

„Það fréttist af loðnu víða þessa dagana. Það virðist vera loðna héðan frá Faxaflóanum og austur með allri suðurströndinni. Það hefur til dæmis verið mikil loðna í Háfadýpinu. Síðan hafa borist fréttir af loðnu fyrir norðan land og nú mun Bjarni Sæmundsson vera að kanna stöðuna þar. Þetta er alvöru, það fer ekkert á milli mála,“ sagði Geir.

Hér má sjá uppruna fréttarinnar á austurfrett.is

 

Líkar þetta

Fleiri fréttir