Veitur semja um uppsetningu á 160 þúsund snjallmælum

Veitur, dótturfélag Orkuveitu Reykjavíkur, hafa tekið tilboði Securitas í uppsetningu á 160 þúsund snjallmælum hjá viðskiptavinum fyrirtækisins. Um er að ræða mælaskipti á um 102 þúsund rafmagnsmælum, 55 þúsund varmamælum og þrjú þúsund vatnsmælum á þjónustusvæði Veitna. Samningurinn er um 1.800 milljóna króna virði.

Snjallmælar eru jákvætt skref í þróun veitukerfa og hafa stjórnvöld víða um heim gert kröfu um snjallvæðingu mæla. Ávinningur fyrir viðskiptavini og samfélagið í heild er mikill. Áætlunarreikningar munu heyra sögunni til og mánaðarlegir reikningar framvegis byggðir á raunnotkun. Því fylgir að viðskiptavinir geta átt von á árstíðarbundnum sveiflum í orkuútgjöldum. Með nýju mælunum hafa notendur einnig möguleika á að fylgjast með orkunotkuninni á „mínum síðum“ á vef Veitna og gera ráðstafanir til sparnaðar ef þurfa þykir.

Samkvæmt tilkynningu frá Veitum verður á næstu mánuðum hafist handa við undirbúning verkefnisins og þjálfun starfsfólks.  Lítið svæði verður tekið fyrir og það snjallvætt á síðasta ársfjórðungi þessa árs. Þar verður um eins konar sannprófunarverkefni að ræða áður en hafist verður handa af fullum krafti við mælaskiptin um mitt næsta ár. Áætlanir gera ráð fyrir að snjallmælavæðingu veitukerfanna verði að fullu lokið í árslok 2024.

Líkar þetta

Fleiri fréttir