Með samstilltu átaki tókst að snúa tapi í hagnað

Aðalfundur Knattspyrnufélags ÍA verður haldinn fimmtudaginn 18. febrúar nk. kl. 20 í fundarsalnum í Íþróttamiðstöðinni að Jaðarsbökkum. „Stjórn félagsins hefur ákveðið að halda fundinn miðað við þær samkomutakmarkanir sem í gildi eru, en þær heimila 20 manna fund en það er einmitt sá lágmarksfjöldi sem krafist er til þess að fundurinn teljist löglegur. Óskað er eftir skilningi félagsmanna en mikilvægt er að aðalfundur fari fram til að skipa stjórn og taka ársreikning til afgreiðslu þannig að starfið geti haldið áfram sinn vanabundna gang. Jafnframt hefur stjórn félagsins ákveðið að birta á heimasíðu félagsins ársskýrslu og ársreikning fyrir starfsárið 2020, fjárhagsáætlun 2021 og þær lagabreytingar sem fyrir fundinum liggja. Félagsmenn geta því kynnt sér þessi gögn og ef þeir þess óska komið spurningum um þau eða athugasemdum til framkvæmdastjóra (geir@ia.is) þannig að um slíkt megi fjalla á fundinum.“ segir í tilkynningu frá KFÍA. Fundurinn verður sendur út á netinu á ÍATV.

Gert upp með hagnaði

Þá kemur fram í tilkynningu frá félaginu að Knattspyrnufélag ÍA glímdi við erfiðleika í rekstri félagsins á starfsárinu. „Félagið þurfti að hagræða í rekstri sínum vegna Kórónufaraldurins og umtalsverðs rekstrartaps frá fyrra starfsári. Með samstilltu átaki sem fól m.a. í sér launalækkun á öllum sviðum og sölu leikmanna félagsins tókst að reka félagið með hagnaði. Rekstrartekjur voru rúmar 210 milljónir kr. en rekstrargjöld rúmar 207 milljónir kr. sem gerði rekstrarafgang að teknu tilliti til fjármagnsliða upp á 2,7 milljónir króna.“

Aðalfundur KFÍA framundan