Frestur til að skila framboðum til prófkjörs Framsóknarflokksins í Norðvesturkjördæmi rann út um mánaðamótin. Póstkosning verður haldin dagana 16. febrúar til 13. mars og verður kosning bindandi um fimm efstu sætin á lista flokksins fyrir alþingiskosningarnar 25. september. Atkvæðisrétt hafa þeir sem skráðir eru í flokkinn. Kjörstjórn hefur nú kynnt nöfn tíu einstaklinga sem gefa kost á sér í prófkjörinu. Ljóst er að nú stefnir í baráttu um efstu sætin því þrír berjast um forystusæti listans og fjórir óska eftir öðru sæti. Flokkurinn á nú tvo þingmenn í kjördæminu; þau Ásmund Einar Daðason sem nú hyggst bjóða sig fram í Reykjavík og Höllu Signýju Kristjánsdóttur sem sækist eftir öðru af tveimur efstu sætum listans. Nú blanda Stefán Vagn Stefánsson á Sauðárkróki og Guðveig Eyglóardóttir í Borgarnesi sér einnig í toppbaráttuna.

Eftirfarandi gefa kost á sér:

Stefán Vagn Stefánsson, forseti sveitarstjórnar í Skagafirði            1. sæti

Guðveig Eyglóardóttir, sveitarstjórnarmaður í Borgarbyggð           1.-2. sæti

Halla Signý Kristjánsdóttir, alþingismaður í Bolungarvík   1.-2. sæti

Lilja Rannveig Sigurgeirsdóttir, formaður SUF       2. sæti

Iða Marsibil Jónsdóttir, forseti bæjarstjórnar í Vesturbyggð           2.-3. sæti

Gunnar Tryggvi Halldórsson, sveitarstjórnarmaður Blönduósi       3. sæti

Friðrik Már Sigurðsson, verkefnastjóri og sveitarstjórnarfulltrúi, Húnaþingi vestra            3.-4. sæti

Gunnar Ásgrímsson, háskólanemi á Sauðárkróki     5. sæti

Ragnheiður Ingimundardóttir, verslunarmaður í Strandabyggð      5.-6. sæti

Tryggvi Gunnarsson, skipstjóri frá Flatey    3.-5. sæti.