Stykkishólmsbær leiðréttir fréttatilkynningu Breiðafjarðarnefndar

Í fréttatilkynningu Breiðafjarðarnefndar, frá 26. janúar síðastliðnum og birtist í Skessuhorni sem kom út í gær, er fullyrt að af umsögn Stykkishólmsbæjar við skýrslu nefndarinnar um framtíð Breiðafjarðar megi ráða að sveitarfélagið „sé ekki tilbúið í samstarf um frekari verndun.“ Stykkishólmsbær hefur sent frá sér tilkynningu þar sem þetta orðalag Breiðafjarðarnefndar er leiðrétt:
„Framangreind fullyrðing Breiðafjarðarnefndar, um að Stykkishólmsbær sé ekki tilbúinn í samstarf um verndun, er túlkun Breiðafjarðarnefndar á umsögn Stykkishólmsbæjar. Ekki er um að ræða afstöðu Stykkishólmsbæjar, enda kemur það ekki fram í umsögn Stykkishólmsbæjar að sveitarfélagið sé ekki tilbúið í samstarf um verndun. Hvað þá að sveitarfélagið sé ekki tilbúið í samstarf um hina fjölbreyttu verndun Breiðafjarðar, hvort sem litið er til verndar á landslagi, einstökum jarðmyndunum og lífríki eða varðveislu menningarsögulegra minja. Umrædd umsögn Stykkishólmsbæjar snýr einungis að fyrirliggjandi tillögum nefndarinnar og rökum nefndarinnar fyrir þeim,“ segir í tilkynningu sem Jakob Björgvin Jakobsson bæjarstjóri Stykkishólmsbæjar undirritar.

Líkar þetta

Fleiri fréttir