Alþingi samþykkti í gær að fela ríkisendurskoðanda að gera úttekt á starfsemi Vegagerðarinnar. Það var Sara Elísa Þórðardóttir, þingmaður Pírata, sem fór fram á úttektina sem var samþykkt með öllum greiddum atkvæðum. Ríkisendurskoðandi mun því ráðast í fjárhags- og stjórnsýsluúttekt á Vegagerðinni og skila skýrslu að þeirri vinnu lokinni. Í beiðninni eru tilgreindir nokkrir þættir sem lagt er til að fjallað verði sérstaklega um í skýrslunni. Í fyrsta lagi að metnir verði þættir sem snúa að stjórnsýslu og stjórnun Vegagerðarinnar. Í öðru lagi þættir sem varða meðferð almannafjár og ráðstöfun til vegaframkvæmda. Loks í þriðja lagi þættir sem varða öryggi vegfarenda á þjóðvegum landsins og eftirlit með vegaframkvæmdum.

„Í fyrra komu upp nokkur tilvik þar sem slys og tjón urðu í kjölfar vegaframkvæmda, á sama tíma og miklu fé hefur verið varið í samgönguframkvæmdir í tengslum við fjárfestingaáætlun ríkisstjórnarinnar í faraldrinum. Líklega hefur því aldrei verið jafn rík þörf og nú til að hafa eftirlit með starfsemi og skilvirkni Vegagerðarinnar,“ sagði Sara Elísa eftir að stuðningur þingheims við tillögu hennar lá fyrir.