Sigurður Guðmundsson framkvæmdastjóri UMSB.

UMSB falin verkefni fyrir UMFÍ

Ungmennafélag Íslands hefur samið um tilfærslu verkefna til Ungmennasambands Borgarfjarðar. Í samningnum felst að UMSB tekur að sér ýmis verkefni á sviði forvarna- og lýðheilsumála. Samningurinn er nýstárlegur og er liður UMFÍ í því að styrkja íþróttahéruð landsins. Samningurinn kveður á um að Sigurður Guðmundsson, framkvæmdastjóri UMSB, sinni vinnunni fyrir UMFÍ meðfram störfum sínum fyrir UMSB.

Sigurður þekkir vel til starfsemi UMFÍ. Var hann starfsmaður þess 2008-2014 og sá þá m.a. um námskeið og fræðslu. Þá hefur hann unnið fyrir Íþróttabandalagi Reykjavíkur, aðra sambandsaðilum UMFÍ og m.a. komið að skipulagningu Reykjavíkurmaraþons. Auk þess hefur hann verið tómstundafulltrúi Borgarbyggðar fyrir hönd UMSB og setið í Æskulýðsráði ríkisins og vann þar m.a. að stefnumótun æskulýðsfélaga á Íslandi. Sigurður var jafnframt um skeið formaður Ungmennafélagsins Íslendings sem rekur m.a. Hreppslaug í Skorradal.

„Mér lýst afar vel á þetta fyrirkomulag enda gagnast það bæði UMSB og UMFÍ. UMSB er í þeirri stöðu að geta tekið við verkefnum frá UMFÍ. Þetta er því kjörið tækifæri og bæði eykur og styrkir samstarf UMFÍ og USMB. Ég sé fyrir mér að í framtíðinni muni fleiri íþróttahéruð taka að sér aukin verkefni fyrir íþróttahreyfinguna með sambærilegum hætti,“ segir Sigurður.

Líkar þetta

Fleiri fréttir