Fulltrúar fimm af sjö dvalar- og hjúkrunarheimilum sáu sér fært að mæta og taka við blómvendi og viðurkenningarskjali. Þau eru f.v: Inga Kristinsdóttir frá Jaðri í Ólafsvík, Kjartan Kjartansson frá Höfða á Akranesi, Ása María Hauksdóttir frá Silfurtúni í Búðardal, Björn Bjarki Þorsteinsson frá Brákarhlíð í Borgarnesi og Kristín Hannesdóttir frá Stykkishólmi. Á myndina vantar fulltrúa frá Fellaskjóli í Grundarfirði og Fellsenda í Dölum. Ljósm. Gunnhildur Lind.

Vestlendingar ársins eru starfsfólk dvalar- og hjúkrunarheimila

Niðurstaða úr vali á Vestlendingi ársins 2020 var lýst í hádeginu í dag við fámenna en góðmenna athöfn í Borgarnesi. Þetta er í 23. skipti sem Skessuhorns gengst fyrir vali á einstaklingi eða hópi í landshlutanum sem þykir hafa skarað framúr á árinu. Lýst var eftir tilnefningum og vann dómnefnd á Skessuhorni úr þeim. Niðurstaðan var afgerandi. Vestlendingar ársins 2020 eru starfsfólk sjö dvalar- og hjúkrunarheimila á Vesturlandi. Þessi stóri hópur fólks á miklar þakkir skildar fyrir frumkvæði, elju og fórnfýsi á árinu við að verja heimilin fyrir kórónaveirunni.

Heimilin eru:

  • Brákarhlíð, hjúkrunar- og dvalarheimili í Borgarnesi
  • Dvalarheimili aldraðra í Stykkishólmi
  • Dvalar- og hjúkrunarheimilið Fellaskjól í Grundarfirði
  • Dvalar- og hjúkrunarheimilið Jaðar í Ólafsvík
  • Dvalar- og hjúkrunarheimilið Silfurtún í Búðardal
  • Hjúkrunarheimilið Fellsenda í Dölum
  • Höfði, hjúkrunar- og dvalarheimili á Akranesi

Skessuhorn færir, fyrir hönd íbúa á Vesturlandi, starfsfólki þessara sjö heimila hamingjuóskir með frábæran árangur á árinu 2020. Jafnframt er táknrænt að í dag hefst bólusetning vegna kórónuveirunnar og á morgun, miðvikudag, verða íbúar allra dvalar- og hjúkrunarheimila í landshlutanum bólusettir.

Líkar þetta

Fleiri fréttir