Ingþór Bergmann Þórhallsson kaupmaður í Omnis.

Jólavertíð kaupmanna á Akranesi byrjaði fyrr í ár

Kaupmenn á Akranesi láta afar vel af jólavertíðinni það sem af er. Almennt virðist hún koma mjög vel út í samanburði við fyrr ár, salan er jöfn og góð og fólk virðist almennt hafa farið fyrr af stað við undirbúning og jólagjafakaup.

Ingþór Bergmann Þórhallsson, eigandi verslunarinnar Omnis á Akranesi lét mjög vel af jólavertíðinni í samtali við Skessuhorn á föstudag. „Verslunin er öðruvísi en hún hefur verið áður. Fólk kaupir greinilega mikið í heimabyggð í stað þess að fara til Reykjavíkur eða að panta vörurnar erlendis frá. Það hefur líka verið áþreifanlegt að fólk er mun fyrr á ferðinni í ár og mikið til búið að þessu. Að því sögðu þá geri ég samt ráð fyrir mikilli sölu síðustu dagana fyrir jólin.“

Ingþór segir að kauphegðun fólks sé talsvert frábrugðin því venjulega. „Ástandið er þannig að fólk fylgist mikið með á netinu. Til dæmis fylgist það mjög vel með verslunarmönnum á Instagram. Þegar fólk sér að hlutir eru mikið til að klárast þá er rokið til og gengið frá kaupum.“

Covid hefur haft mikil áhrif á vöruinnflutning og framboð á vörum. „Það er fullt af vörum sem við hreinlega náum ekki í. Varan er bara búin. Sem dæmi má nefna að Moccha latte kaffivélar í svörtu og silfurgráu seldust upp í lok október. Þær eru ekki til í landinu. Þær eru reyndar til í einhverjum öðrum litum,“ segir Ingþór. „Hjá einum af birgjum okkar fyrir tölvur í Reykjavík eru bara allar hillur tómar. Þeir eiga í miklum erfiðleikum með að fá þær vörur sem þeir vilja.“ Aðspurður um þessa miklu sölu undanfarið segir Ingþór: „Það hefur verið meiri sala á tölvum en venjulega. Fólk vinnur mikið heima. Fyrsta mánuðinn í Covid seldist mest af búnaði til að hafa heima, eins og lyklaborð, mýs, tölvuskjáir, vefmyndavélar og heyrnartól. Þetta rauk allt saman út. Í næsta mánuði á eftir, eða í apríl, var ekki sama vöruflóra að seljast heldur var bara almennt að seljast meira, yfir alla línuna,“ segir Ingþór sem er ánægður með söluna í búðinni sinni á Akranesi.

Líkar þetta

Fleiri fréttir

Látrabjarg er nú friðlýst

Guðmundur Ingi Guðbrandsson, umhverfis- og auðlindaráðherra, hefur skrifað undir plagg til friðlýsingar Látrabjargs. Viðstaddir undirskriftina voru fulltrúar Bjargtanga, félags land-... Lesa meira