Hluti nemenda og starfsfólks í sóttkví eftir að smit var greint

Covid-19 smit hefur verið greint í starfsmanna- og nemendahópi Grundaskóla á Akranesi. Í tilkynningu frá skólanum nú í morgun segir: „Nú stöndum við frammi fyrir því að Covid-19 smit hefur komið upp hjá starfsmanni skólans og hjá nemanda á unglingastigi. Nokkrir starfsmenn og nemendur skólans þurfa að fara í sóttkví fram á mánudag. Þetta varðar hluta nemenda í sóttvarnarhólfi 9. bekkjar og hluti skólahóps sem sótti æfingu á bókasafni skólans síðastliðinn mánudag. Þessi aðgerð er öryggisráðstöfun ef frekara smit kemur upp.“

Í tilkynningu frá skólanum eru foreldrar og forráðamenn barna beðnir að fylgjast vel með heilsufari nemenda og hafa samband við heilsugæsluna ef þeir fá einkenni. Einnig þarf að láta skólann vita ef nemendur fá einkenni og/eða veikjast. „Smitrakning er unnin í nánu samstarfi við smitrakningarteymi Almannavarna og mun teymið hafa samband við viðkomandi aðila er málið varðar með frekari upplýsingar á næstunni. Gert er ráð fyrir að allur hópurinn fari í skoðun og greiningarpróf næstkomandi mánudag til að tryggja að fleiri séu ekki smitaðir. Vonandi geta allir snúið aftur til skóla næstkomandi þriðjudag, 8. desember.“

Líkar þetta

Fleiri fréttir