Best er að hafa reykskynjara í öllum rýmum íbúðarhúsnæðis.

Alltof mörg heimili eru berskjölduð fyrir eldsvoðum

Ný könnun Gallup um eldvarnir á heimilum sýnir að alltof mörg heimili eru vanbúin nauðsynlegum eldvarnabúnaði og þar með berskjölduð fyrir eldsvoðum. „Það er brýnna en nokkru sinni að hvetja fólk til að efla eldvarnir heimilisins, ekki síst í ljósi þess að það sem af er ári hafa fleiri látist í eldsvoðum hér á landi en dæmi eru um í áratugi, langt umfram það sem gerist í meðalári. Veirufaraldurinn gerir okkur vissulega erfitt fyrir að þessu sinni en við teljum að fræðsla um eldvarnir eigi erindi við almenning sem aldrei fyrr,“ segir Hermann Sigurðsson, framkvæmdastjóri Landssambands slökkviliðs- og sjúkraflutningamanna, en Eldvarnaátak landssambandsins fer fram um allt land á næstu vikum og hefst í dag.

Sláandi niðurstöður könnunar

Samkvæmt könnun sem Gallup vann í haust eru heimilin í landinu mjög misjafnlega vel varin gagnvart eldsvoðum. Almennt sýna kannanir sem Gallup hefur gert fyrir Eldvarnabandalagið og LSS að heimilin efla eldvarnir jafnt og þétt. Frá þessu eru þó töluverð frávik. Könnunin sýnir til dæmis að eldvarnir á heimilum í Reykjavík eru mun lakari en á heimilum utan höfuðborgarsvæðisins. Fólk á aldrinum 25-34 ára er mun ólíklegra en aðrir til að hafa eldvarnateppi og slökkvitæki á heimilinu. Eldvarnateppi eru að meðaltali á 64,3 prósent heimila en aðeins hjá 48% í umræddum aldurshópi. Könnunin leiðir einnig í ljós að eldvarnir í fjölbýlishúsum eru lakari en almennt gerist og þá sérstaklega í stærri fjölbýlishúsum.  Loks kemur fram að íbúar í leiguhúsnæði eru sem fyrr mun verr búnir undir eldsvoða en aðrir. Könnun Gallup leiddi í ljós að í 45% íbúða í leiguhúsnæði er enginn eða aðeins einn reykskynjari. Sambærilegt hlutfall á landsvísu er 28%.

Fræðsla til þriðju bekkinga

Slökkviliðin beina fræðslu um eldvarnir að nemendum í 3. bekk grunnskóla og fjölskyldum þeirra. Lögð er áhersla á að heimili séu búin eldvarnabúnaði á borð við reykskynjara, slökkvitæki og eldvarnateppi:

  • Best er að hafa reykskynjara í öllum rýmum.
  • Slökkvitæki á að vera við helstu flóttaleið.
  • Eldvarnateppi á að vera á sýnilegum stað í eldhúsi.
  • Tryggja þarf öllum á heimilinu að minnsta kosti tvær flóttaleiðir.
  • Allir þekki neyðarnúmerið, 112, líka börnin.

Eldvarnagetraun

Að jafnaði fer Eldvarnaátakið þannig fram að slökkviliðsmenn heimsækja skóla um land allt og ræða við börnin í 3. bekk um eldvarnir. Veirufaraldurinn kemur nú víða í veg fyrir heimsóknir í skóla og munu skólarnir í mörgum tilvikum sjá sjálfir um fræðsluna að þessu sinni. Börnin fá að sjá teiknimyndina um Loga og Glóð og baráttu þeirra við Brennu-Varg. Þau fá eintak af handbók Eldvarnabandalagsins um eldvarnir heimilisins, endurskinsborða frá Neyðarlínunni, 112, og fleira. Þeim gefst jafnframt kostur á að taka þátt í Eldvarnagetrauninni en svörum er nú skilað með rafrænum hætti í fyrsta sinn á lsos.is/eldvarnaatak. Vegleg verðlaun eru í boði og verða þau afhent á 112-deginum, 11. febrúar 2021.

Líkar þetta

Fleiri fréttir

Fjölgar í einangrun

Lítilsháttar hefur nú fjölgað þeim sem eru í einangrun með Covid-19 á Vesturlandi. Samkvæmt upplýsingum frá Lögreglunni á Vesturlandi nú... Lesa meira