Tilslakanir á sóttvarnaráðstöfunum í framhaldsskólum

Sveigjanleiki verður aukinn fyrir nemendur, starfsfólk og kennara í framhaldsskólum landsins frá og með miðvikudeginum 18. nóvember nk og mun gilda til 1. desember. Gildandi sóttvarnareglur kveða á um að hámarksfjöldi nemenda og starfsmanna fari aldrei yfir tíu í hverju rými en frá og með miðvikudeginum verður hámarksfjöldinn hækkaður í 25 einstaklinga í hverju rými. Regla um minnst tveggja metra fjarlægð milli fólks verður áfram í gildi, og sé ekki hægt að halda lágmarksfjarlægð ber nemendum og starfsfólki að nota grímur.

„Við teljum við mikilvægt að opna framhaldsskólana með þessum hætti og skapa svigrúm fyrir meira starf innan veggja framhaldsskólanna. Ég treysti skólastjórnendum til þess að aðlaga sitt skólastarf með hliðsjón af þessum tilslökunum og aðstæðum hverju sinni. Skólafólk hefur unnið þrekvirki við að halda uppi virku skólastarfi og leitar sífellt leiða til það mæta fjölbreyttum þörfum sinna nemenda,“ segir Lilja Alfreðsdóttir mennta- og menningarmálaráðherra.

Ekki eru fyrirhugaðar hliðstæðar breytingar og tilslakanir á hámarksfjölda í háskólum. Þar gildir áfram regla um að fjöldi nemenda og starfsmanna fari ekki yfir tíu í hverju rými. Heimilt er þó að halda samkeppnispróf, þýðingarmikil lokapróf og staðbundnar námslotur fyrir allt að 30 einstaklinga í vel loftræstum rýmum, að uppfylltri tveggja metra nálægðartakmörkun og ýtrustu sóttvarnaráðstöfunum.

Líkar þetta

Fleiri fréttir