Álversbyggingin í Helguvík sem mögulega verður breytt í eldisstöð fyrir fisk. Ljósm. Víkurfréttir; www.vf.is

Norðurál selur Samherja eignir í Helguvík

Norðurál og Samherji fiskeldi, sem er hluti af samstæðu Samherja, hafa undirritað viljayfirlýsingu um kaup Samherja á eignum Norðuráls í Helguvík. Þar stóð sem kunnugt er lengi til að reisa og starfrækja álver. Í Helguvík hyggst Samherji nú kanna möguleika á því að byggja landeldisstöð við eignirnar sem nú standa í víkinni, að því er fram kemur í tilkynningu frá fyrirtækinu. Er frumathugun á aðstæðum til laxeldis í Helguvík þegar hafin og niðurstöðu er að vænta fyrir áramót. „Samherji fiskeldi hefur áhuga á að vaxa í landeldi á laxi og er með mögulega staðsetningu í eignum Norðuráls í Helguvík til skoðunar. Á næstu vikum munum við fara yfir forsendur og möguleika til laxeldis á svæðinu áður en frekari ákvarðanir verða teknar,“ segir Jón Kjartan Jónsson, framkvæmdastjóri Samherja fiskeldis.

Samherji fiskeldi er þegar með starfsemi á Suðurnesjum. Fyrirtækið rekur sláturhús og vinnslu í Sandgerði, eldisstöð á Stað við Grindavík og eldisstöð á Vatnsleysuströnd. Þess utan rekur fyrirtækið landeldi á laxi á Núpsmýri við Kópasker og seiðastöð á Núpum í Ölfusi. „Samherji fiskeldi hefur einkum lagt áherslu á landeldi í sínum rekstri og er stærsti framleiðandi bleikju í heiminum með tæplega 3.800 tonn árlega. Þá framleiðir félagið um 1.500 tonn af laxi,“ segir í tilkynningu frá Samherja.

Líkar þetta

Fleiri fréttir