Mikil umræða hefur verið um helgina í fjölmiðlum og á samfélagsmiðlum um þá ákvörðun sóttvarnayfirvalda að láta loka golfvöllum á höfuðborgarsvæðinu til 19. október næstkomandi. Þau tilmæli voru gefin út vegna víðtæks smits Covid-19 á höfuðborgarsvæðinu. Golfvellir í nágrenni höfuðborgarsvæðisins takmörkuðu flestir skráningar á velli sína við félagsmenn sem búsettir eru á viðkomandi svæði, en á því eru þó undantekningar. Ljóst er að ákvörðun um lokun golfvalla á höfuðborgarsvæðinu hefur sætt gagnrýni, sem og sú ákvörðun stjórna nokkurra golfvalla á landsbyggðinni um að loka ekki völlum sínum fyrir aðra en íbúa á svæðinu eins og mælst hafði verið til. Á hinn bóginn telja margir golfiðkendur að lítil hætta sé á að golfspilari smiti aðra, beri þeir sjúkdóminn, sé allra varúðarráðstafana gætt. Engu að síður var það ákvörðun Golfsambands Íslands að verða við tilmælum sóttvarnayfirvalda um að leggja af alla íþróttastarfsemi á höfuðborgarsvæðinu til 19. október og þar með talið golfiðkun.

Golfsamband Íslands sendi frá sér fréttatilkynningu í dag, þar sem ákvörðun GSÍ er útskýrð. Hún er hér í heild sinni:

Yfirlýsing vegna lokunar golfvalla á höfuðborgarsvæðinu

„Ákvörðun um lokun golfvalla á höfuðborgarsvæðinu til 19. október var ekki tekin tekin af Golfsambandi Íslands heldur er hún tilkomin vegna tilmæla sóttvarnalæknis og almannavarnadeildar ríkislögreglustjóra (hér eftir nefnd sóttvarnayfirvöld) og ákvörðunarferlið er útskýrt hér að neðan.

Viðbragðshópur Golfsambands Íslands, sem skipaður er tólf fulltrúum frá tíu golfklúbbum af öllu landinu, ásamt fulltrúum úr stjórn GSÍ, hefur unnið saman að málum tengdum sóttvörnum og golfiðkun frá því í vor, sökum Covid-19. Í ljósi misvísandi upplýsinga og þeirrar gagnrýni sem beinst hefur að þeirri ákvörðun að loka golfvöllum á höfuðborgarsvæðinu vill viðbragðshópur GSÍ koma á framfæri eftirfarandi skýringum. Með því vonast hópurinn til að varpa ljósi á málavexti og ástæður að baki niðurstöðunni.

„Þann 8. október síðastliðinn voru þeim tilmælum sóttvarnayfirvalda beint til íþróttahreyfingarinnar í heild að láta af öllu íþróttastarfi á höfuðborgarsvæðinu, skipulögðu sem óskipulögðu, til 19. október. Tilmælunum var beint að íþróttahreyfingunni í ljósi þess að smitum vegna Covid-19 hefur fjölgað verulega á höfuðborgarsvæðinu á undanförnum dögum og líkur á veldisvexti smita í faraldrinum.

Þegar viðbragðshópurinn kom saman til ákvörðunartöku þann 8. október, lá fyrir að reglugerð heilbrigðisráðherra og fyrirmæli sóttvarnayfirvalda fóru ekki saman að öllu leyti. Á sama tíma og reglugerð ráðherra leggur ekki bann við íþróttaiðkun utandyra þá ganga tilmæli sóttvarnayfirvalda lengra og taka einnig til íþróttaiðkunar utandyra. Þrátt fyrir þetta misræmi kemur fram á heimasíðu heilbrigðisráðuneytisins að fólk sé engu að síður hvatt til þess að fylgja tilmælum sóttvarnayfirvalda, sem gangi lengra en reglugerðin.

Vegna þessa misræmis kallaði viðbragðshópurinn eftir skýringum og staðfestingu á því að tilmæli sóttvarnayfirvalda næðu einnig til golfiðkunar, enda telur hópurinn að vel sé hægt að stunda golf og gæta að sóttvörnum á sama tíma.

Eftir samtal og samráð við fulltrúa Íþrótta- og Ólympíusambands Íslands og almannavarnadeild ríkislögreglustjóra var staðan metin að morgni 9. október. Lá þá fyrir munnleg staðfesting sóttvarnayfirvalda um að mælst væri til þess að golfvöllum á höfuðborgarsvæðinu yrði lokað.

Vegna hinna skýru og afdráttarlausu tilmæla ákvað viðbragðshópurinn að beina því til golfklúbba á höfuðborgarsvæðinu að loka umsvifalaust sínum golfvallasvæðum til 19. október. Kylfingar á höfuðborgarsvæðinu voru jafnframt hvattir til þess að takmarka ferðalög frá höfuðborgarsvæðinu. Ákvörðun viðbragðshópsins var tekin eftir miklar umræður og var hún engan veginn léttvæg. Full samstaða var innan hópsins um ákvörðunina.

Viðbragðshópurinn hittist enn á ný í gær þann 10. október til þess að endurmeta stöðuna, ekki síst vegna þess að kylfingar höfðu margir fengið misvísandi skilaboð um forsendur að baki ákvörðuninni og því slegið föstu að lokun golfvalla væri að frumkvæði golfsambandsins. Því fer fjarri. Viðbragðshópurinn óskaði því eftir skriflegri staðfestingu Víðis Reynissonar, yfirlögregluþjóns hjá almannavarnadeild ríkislögreglustjóra, sem nú hefur borist, þess efnis að tilmæli sóttvarnayfirvalda taki til golfiðkunar og af þeim sökum skuli golfvellir á höfuðborgarsvæðinu vera lokaðir til 19. október. Tilmæli sóttvarnayfirvalda eru skýr og stendur niðurstaða viðbragðshópsins því enn óbreytt. Á sama tíma og hópurinn áttar sig fyllilega á því hversu leiðinlegt það er að geta ekki lokið síðustu dögum golftímabilsins þá biðjum við kylfinga um að sýna ákvörðuninni skilning og virða hana.“

Reykjavík, 11. október 2020

F.h. viðbragðshóps GSÍ

Ágúst Jensson, GM

Brynjar Eldon Geirsson, GSÍ

Elsa Valgeirsdóttir, GV

Haukur Örn Birgisson, GSÍ

Hulda Bjarnadóttir, GSÍ og NK

Jón Steindór Árnason, GSÍ og GA

Knútur Grétar Hauksson, GÖ

Ólafur Þór Ágústsson, GK

Ómar Örn Friðriksson, GR

Sigurður Kristinn Egilsson, GKG

Sigurpáll Geir Sveinsson, GS

Þorvaldur Þorsteinsson, GO.“

Tilmæli um lokun golfvalla komu frá sóttvarnayfirvöldum