Hjólað á Akranesi. Myndin tengist fréttinni ekki með beinum hætti. Ljósm. úr safni/ kgk.

Losað um dekk reiðhjóla

Brögð hafa verið að því að átt hafi verið við reiðhjól á Akranesi þannig að hætta skapist þegar hjólað er af stað. Frá þessu er greint á heimasíðu Grundaskóla, en foreldrum nemenda skólans hefur einnig verið send tilkynning þess efnis. „Því miður hefur það komið upp hér hjá okkur í Grundaskóla og við aðrar stofnanir og heimili á Akranesi að einhverjir einstaklingar eru að fikta í hjólabúnaði reiðhjóla og losa dekkin eða annan öryggisbúnað þannig að hætta skapast þegar hjólað er af stað,“ segir í tilkynningu um málið á vef Grundaskóla. Þar segir enn fremur að svona lagað komi því miður reglulega upp um allt land. Um sé að ræða stórhættulegt athæfi sem skólastjórnendur líti alvarlegum augum. „Við viljum einnig benda öllum á að fara vel yfir hjólabúnað barna sinna og ítreka við þau að athuga hjólabúnað áður en lagt er af stað,“ segir á vef skólans.

Líkar þetta

Fleiri fréttir