Í dag mun Síminn hf. hrinda af stað fyrsta áfanga í lokun á hinu gamla rásaskipta talsímakerfi landsmanna. Áætlanir fyrirtækisins gera ráð fyrir því að kerfið verði að fullu niðurlagt á síðasta ársfjórðungi 2021.

Á umliðnum árum hafa fjarskiptakerfi sem byggja á hliðrænni tækni verið að víkja fyrir stafrænum netum sem þykja hagkvæmari í rekstri. Með árunum hefur það reynst kostnaðarsamt og tæknilega flókið að viðhalda talsímakerfinu, en hætt er að framleiða ýmsan búnað sem styður við kerfið. „Sú tækniumbreyting sem felst í því að hverfa frá hliðrænum fjarskiptanetum yfir í stafræn fjarskiptanet er því óumflýjanleg og hefur sú þróun átt sér stað um allan heim. Mörg ríki Evrópu hafa annað hvort lokið þessari umbreytingu eða eru langt komin með hana. Má þar nefna ríki á borð við Eistland, Holland, Noreg og Sviss. Þessi ríki eiga það sammerkt að útbreiðsla háhraðaneta er almennt góð, hvort sem um er að ræða fastanetstengingar eða farnetssambönd. Netrekendur talsímakerfa í öðrum ríkjum álfunnar eru flestir með tímasettar áætlanir um lokun kerfanna á allra næstu árum,“ segir í tilkynningu frá Póst- og fjarskiptastofnun.

Ísland stendur mjög framarlega í alþjóðlegum samanburði þegar kemur að útbreiðslu háhraðaneta. Þannig hafa 97% landsmanna aðgang að háhraða fastanetstengingu (ljósleiðari eða VDSL) og 3G farnetsþjónusta nær til 99,97% landsmanna. Ísland er því vel í stakk búið til að mæta þeirri tækniumbreytingu sem framundan er, að mati stjórnvalda.

Í nokkrum tilfellum munu heimili eða vinnustaðir missa allt fjarskiptasamband við lokun talsímakerfisins. Engin slík tilvik eru þó fyrirséð við lokun þessa fyrsta áfanga. Til að bregðast við stöðunni hefur Póst- og fjarskiptastofnun (PFS) útnefnt Neyðarlínuna ohf. sem alþjónustuveitanda til að útvega fjarskiptatenginu fyrir símaþjónustu og nothæfa internetþjónustu í þessum sérstöku tilvikum. Enginn á því að verða sambandslaus eftir að gamla talsímakerfinu hefur verið lokað.

Loks liggur fyrir að einhverjir notendur þurfi að gera breytingar á fjarskiptaþjónustu sinni við lokun talsímakerfisins, t.d. að panta stafræna símaþjónustu (VoIP) um koparheimtaugina, sem áfram verður í notkun þrátt fyrir lokun talsímakerfisins, eða virkja ljósleiðaratengingu sem búið er að leggja að húsi. Í slíkum tilvikum leiðbeinir PFS notendum að hafa samband við þjónustuveitanda sinn um breytingar á þjónustu.

Lokun gamla talsímakerfisins hefst í dag