Álfheiður Ágústsdóttir hefur tekið við starfi forstjóra Elkem Ísland. Ljósm. aðsend.

Ráðin forstjóri Elkem Ísland

Álfheiður Ágústsdóttir hefur tekið við starfi forstjóra Elkem Ísland á Grundartanga. Í tilkynningu frá fyrirtækinu kemur fram að Einar Þorsteinsson, fráfarandi forstjóri, hafi af persónulegum ástæðum óskað eftir því að draga úr vinnuframlagi sínu og ábyrgð. Einar mun þó taka sér stöðu við hlið nýráðins forstjóra sem ráðgjafi á sviði orkumála og vinnumarkaðar. Álfheiður Ágústsdóttir hefur gegnt starfi framkvæmdastjóra fjármála og innkaupa hjá Elkem. Hún hóf störf hjá fyrirtækinu sem sumarstarfsmaður árið 2006, fyrst í framleiðsludeild og síðar á fjármálasviði. Í upphafi sinnti hún ýmsum störfum hjá Elkem samhliða námi sínu í reikningshaldi og endurskoðun en hefur verið í fullu starfi frá 2009.

Líkar þetta

Fleiri fréttir