Hjörtur Guðmundsson lenti í því um helgina að mikil skemmdarverk voru unnin á eigum hans. Hann á og rekur sumarbústaðina Hálsaból sem standa undir Kirkjufelli. Hann hefur verið að leigja þá út til ferðamanna undanfarin ár og gengið ágætlega.

En um liðna helgi leigði hann annan bústaðinn til fjögurra ungra manna í gegnum íslenska bókunarsíðu. Mennirnir hafa hreinlega gengið berserksgang um helgina því mikið var brotið og bramlað. Hann lýsir aðkomunni á Facebook-síðunni „Landið mitt Ísland“, sem er mikið notuð af þjónustuaðilum í ferðaþjónustu. Rúður voru brotnar, sjónvarp eyðilagt og innanstokksmunum kastað til.

Svo var farið inn í vélageymslu á bænum Hálsi þar sem mikið var rótað og rúður brotnar í dráttarvél og bendir flest til þess að þar hafi sömu leigjendur verið á ferð.

Áætlar Hjörtur að tjónið nemi um það bil sjöhundruð þúsund krónum og reiknar hann ekki með að fá neitt af því bætt segir hann á síðunni. Málið hefur verið kært til lögreglu.

: Rúður voru brotnar, sjónvarp eyðilagt og innanstokksmunum kastað til. Ljósm. tfk.

Lögðu sumarbústað í rúst