Fiskistofa hefur úthlutað aflamarki fyrir fiskveiðiárið 2020/2021 sem hefst á morgun. Úthlutunin fer fram á grundvelli aflahlutdeilda að teknu tilliti til 5,3% frádráttar fyrir jöfnunaraðgerðir með sama hætti og undanfarin ár. Tekið skal fram að enn eru fáein skip ófrágengin og getur því úthlutun til skipa enn breyst lítillega. Að þessu sinni er úthlutað 353 þúsund tonnum í þorskígildum talið samanborið við um 372 þúsund þorskígildistonn í fyrra. Úthlutun í þorski er tæp 202 þúsund tonn og dregst saman um 13 þúsund tonn frá fyrra ári. Ýsukvótinn eykst um 3 þúsund tonn og fer í rúm 35 þúsund tonn. „Vakin er athygli á að síðar á árinu verður úthlutað aflamarki í deilistofnum og ekki er óalgengt að aukið sé við aflamark í uppsjávarfiski. Benda má sérstaklega á að engri loðnu var úthlutað að þessu sinni. Ætla má að heildaraflamark einstakra skipa og hafna og innbyrðishlutfall þeirra breytist í kjölfar frekari úthlutana þegar líður á fiskveiðiárið,“ segir í tilkynningu frá Fiskistofu.

Nú er það Guðmundur í Nesi sem slær út Sólbergið sem það skip sem fær mestu aflamarki úthlutað. Guðmundur í Nesi fær 13.714 þorskígildistonnum úthlutað en Sólber fær úthlutað 10.670 þorskígildistonnum – það er um 300 tonnum meira en í fyrra en dugar ekki til þegar Guðmundur í Nesi bætti við sig um 3.000 tonnum. Þessi tvö skip skera sig úr frá öðrum skipum að þessu leyti.

Úthlutun eftir fyrirtækjum

Fimmtíu stærstu útgerðarfyrirtækin fá úthlutað sem nemur um 90,4% af því aflamarki sem úthlutað er og hækkar það hlutfall lítillega frá í fyrra. Alls fá 326 fyrirtæki eða lögaðilar úthlutað nú eða tíu færri en í fyrra. Sé litið til þeirra sem eru með mesta úthlutun fær Brim (áður HB Grandi) mestu úthlutað til sinna skipa eða 9,6% af heildinni, næst kemur Samherji með 6,9%, þá FISK Seafood með 6,3% og Þorbjörn hf. með 5,6%.

Bátar með krókaaflamark eru nú 238 og fækkar um 47. Skipum í aflamarkskerfinu fækkar um sex á milli ára og eru nú 175. Bátar undir 15 m og 30 tonnum fá úthlutað rúmlega 46 þúsund þorskígildistonnum en bátar yfir 15 og 30 tonnum fá úthlutað 306 þúsund þorskígildistonnum.

Alls 1.852 þorskígildistonnum er úthlutað nú í upphafi árs sem skel- og rækjubótum en það er um heldur minna en í fyrra og fara þau til 50 báta en þeir voru 51 á fyrra ári.

Sjá nánar á vef Fiskistofu.

Úthlutun aflaheimilda fyrir væntanlegt kvótaár