Lilja Alfreðsdóttir, mennta- og menningarmálaráðherra, vill fjölga kennslustundum í íslensku og raungreinum í grunnskólum landsins frá og með haustinu 2021. Áformin hafa verið kynnt í samráðsgátt stjórnvalda. Í samráðsgáttinni kemur fram að tilefni breytinganna sé viðvarandi slakur árangur nemenda í lesskilningi og náttúrufræði, samanborið við önnur lönd. Í því samhengi er vísað til PISA-kannanarinnar svokölluðu, sem gerð er meðal 15 ára nemenda grunnskólanna á þriggja ára fresti.

Breytingar á öllum stigum

Breytingar á viðmiðunarstundaskrá grunnskóla fela í sér að á yngsta stigi (1.-4. bekk) verður gert ráð fyrir að meðaltali 80 mínútum á viku í íslensku í hverjum árgangi. Á miðstigi (5.-7. bekk) verði tæpri klukkustund á viku varið í íslensku í hverjum árgangi. „Með því fer hlutfall íslensku á viðmiðunarstundaskrá grunnskóla úr 18,08% í 21,5%. Grunnskólar hafa svigrúm og sveigjanleika innan hvors stigs til að útfæra þessa aukningu. Jafnframt fellur niður svigrúm grunnskóla til ráðstöfunar tíma á yngsta- og miðstigi grunnskóla, en algengt er að skólar nýti hluta þess tíma til lestrar- og íslenskukennslu,“ segir í samráðsgáttinni.

Á unglingastigi (8.-10. bekk) er gert ráð fyrir aukinni áherslu á náttúrugreinar, en í staðinn verði dregið úr vali nemenda. „Aukningin er veruleg og er að meðaltali 120 mínútur á viku í hverjum árgangi,“ segir í samráðsgáttinni. Hlutfall náttúrugreina í viðmiðunarstundaskrá fer við þessa breytingu úr 8,33% í rúmlega 11%.

Fer nær meðaltali nágrannaþjóða

Í samráðsgáttinni segir að hér á landi sé lægstu hlutfalli kennslutíma varið til kennslu móðurmáls í 1.-7. bekk, samanborið við nágrannalöndin. „Með þessum breytingum færist íslensk viðmiðunarstundaskrá grunnskóla nær meðaltali í móðurmáli- og náttúrufræðigreinum hjá nágrannaþjóðum okkar,“ segir í samráðsskjalinu. Þar kemur einnig fram að menntastefna til ársins 2030 sé nú í mótun hjá ráðuneytinu, í víðtæku samstarfi við hagsmunaaðila. Þar verði lögð áhersla á að veita framúrskarandi menntun með áherslu á þekkingu, vellíðan, þrautseigju og árangur í umhverfi þar sem allir skipti máli og geti lært. Þá beiti ráðuneytið sér sömuleiðis fyrir aukinni áherslu á íslensku í öðrum námssviðum og almennt í samfélaginu.

Fleiri kennslustundir í íslensku og raungreinum