Fjölskylda Helga Jónssonar, fyrrverandi starfsmanns Rafmagnsveitna ríkisins í Ólafsvík, færði Snæfellsbæ skemmtilega gjöf á dögunum. Um er að ræða tugi teikninga af fólki, húsum og náttúruperlum í sveitarfélaginu frá árunum í kringum 1970. Stefnt er að því að setja upp sýningu með teikningum Helga á haustmánuðum.

Margar myndanna eru merktar en ekki allar. Teikningum af íbúum svæðisins hefur verið hlaðið upp á Facebook-síðu Snæfellsbæjar og er leitað til íbúa um aðstoð við að bera kennsl á fólkið á teikningunum.

Helgi Jónsson lærði vélvirkjun í Reykjavík og síðar tækniteikningu. Lengst af starfaði hann hjá Rafmagnsveitum ríkisins, fyrst í Ólafsvík en síðar á teiknistofunni í Reykjavík. „Helgi tók til starfa sem vélgæslumaður við rafstöðina í Ólafsvík árið 1963 og bjó þar og starfaði í áratug. Honum leið vel í Ólafsvík, líkaði vel við fólkið og lét sig samfélagið varða. Á meðan hann bjó í Ólafsvík hannaði hann m.a. og teiknaði merki Ungmennafélags Víkins árið 1969 sem enn er notað og var einn af stofnendum Skógræktarfélag Ólafsvíkur og frumkvöðull í þeim fræðum á þessum slóðum,“ segir um Helga á Facebook-síðu Snæfellsbæjar. Hann stundaði myndlist og tréskurð alla ævi og var lengi nemandi í Myndlistarskólanum í Reykjavík. Hann vann að friðarmálum, var virkur í félagsstarfi eldri borgara og skógrækt. Hann ólst upp í vesturbænum í Reykjavík og bjó síðustu ár ævinnar á Seltjarnarnesi.

Ung stúlka sem Helgi teiknaði mynd af árið 1968.

Færðu Snæfellsbæ teikningar Helga Jónssonar að gjöf