Hlaupahópurinn „Hlaupum fyrir Berglindi“ hefur verið duglegur að safna áheitum fyrir sinn málstað en hópurinn ætlaði sér að hlaupa í Reykjavíkurmaraþoninu sem átti að fara fram laugardaginn 22. ágúst. Eins og flestir vita hefur hlaupinu verið aflýst vegna kórónuveirufaraldursins en þeir sem ætluðu að taka þátt hafa verið hvattir til að hlaupa sín hlaup á laugardaginn, hver á sínu svæði. Hlaupahópurinn Hlaupum fyrir Berglindi ætlar að hlaupa í Stykkishólmi á laugardaginn kemur og hafa um 80 manns meldað sig í hlaupið. „Við ákváðum að henda í hlaup fyrst það verður ekkert maraþon. Við erum stór hópur, sambland af Hólmurum, fjölskyldu og vinum, ásamt góðu fólki úr körfuboltanum og læknisfræðinni,“ segir Sigríður Erla Sturludóttir forsprakki málstaðarins, Hólmari og góðvinkona Berglindar Gunnarsdóttur, í samtali við Skessuhorn.

Slasaðist á hálsi og mænu

Eins og nafnið gefur til kynna þá er verið að hlaupa til styrktar Berglindi Gunnarsdóttur. Berglind er 27 ára læknanemi og landsliðskona í körfubolta sem spilaði með Snæfelli í Stykkishólmi í úrvalsdeild kvenna. Hún slasaðist alvarlega á hálsi og mænu í rútuslysi 10. janúar síðastliðinn. „Keppnisskap hefur fylgt Berglindi í gegnum hennar endurhæfingu en enn er langt í land í að ná fullum bata,“ segir í lýsingu um hlaupahópinn. „Reikningur þessi er hugsaður til að létta undir með Berglindi í kostnaðarsömu endurhæfingarferli en einnig til að hjálpa Berglindi að komast aftur út í lífið samhliða áframhaldandi endurhæfingu.“

Hlaupahópurinn hefur safnað yfir sjö milljónum króna þegar þessi frétt er skrifuð en yfir 1000 framlög hafa borist inn síðan söfnunin hófst í júlí. Hægt er heita á hlaupahópinn til 26. ágúst næstkomandi eða leggja inn á styrktarreikning; r.nr:

0301-26-012379, kt. 480720-0160.

Stuðningurinn ómetanlegur

„Við viljum halda áfram að vekja athygli á þessu og halda áfram að safna pening fyrir endurhæfingu Berglindar. Það eru 100 hlauparar skráðir í hlaupahópinn og munu 80 þeirra taka þátt í Hólminum á laugardaginn,“ segir Sigríður Erla. „Gætt verður vel að sóttvörnum og erum við með sérstakan sóttvarnafulltrúa sem mun halda utan um það. Við viljum alls ekkert hópsmit og sýnum sérstaka aðgát þegar að sóttvörnum kemur til að tryggja öryggi allra þátttakenda.“

Ræst verður í hlaupið í hollum og leggja fyrstu hlauparar af stað í hálfmaraþon kl. 10. Fyrsta holl af 10 km hlaupurum leggur svo af stað kl. 10:30. „Við munum hlaupa hring innanbæjar í stað þess að fara langt út fyrir bæjarmörkin. Við höfum það þannig til að gæta öryggis. Þeir sem hlaupa hálfmaraþonið hlaupa tvo hringi. Svo verða heimamenn með drykkjustöðvar á víð og dreif um bæinn, en ásamt því ætlar Stykkishólmsbær að bjóða öllum hlaupurum frítt í sund að hlaupi loknu. Einnig munu veitingastaðir bæjarins leggja hönd á plóg. Narfeyrarstofa, Sjávarpakkhúsið og Skipperinn munu grilla pylsur gegn vægu gjaldi þegar hlauparar koma í mark og seinni partinn munu Skúrinn og Vængjavagninn selja kjúklingavængi. Allur ágóði af sölu veitingastaðanna mun renna í styrktarsjóðinn. Það verður vonandi góð stemning á laugardaginn í Hólminu og hvetjum við bæjarbúa til að koma út á götur og hvetja hlauparana áfram, í hæfilegri fjarlægð auðvitað,“ bætir Sigríður við en hún sjálf hyggst hlaupa hálfmaraþon í fyrsta skipti fyrir vinkonu sína. „Það er ótrúlegt hvað er búið að safnast mikið og erum við virkilega þakklát fyrir allan stuðninginn, hann er ómetanlegur,“ segir Sigríður að endingu.

Hlaupa fyrir Berglindi í Stykkishólmi á laugardaginn