Undirskriftalisti gengur nú um meðal íbúa í Dölum. Þar er mótmælt breytingum á matvöruversluninni í Búðardal úr Kjörbúð í Krambúð, þeim verðhækkunum sem breytingunni hafa fylgt og þess krafist að Kjörbúð verði aftur opnuð í sveitarfélaginu. Íbúar geti ekki sætt sig við allt að 25% hærra vöruverð en var í einu matvöruversluninni í sveitarfélaginu fyrir breytingarnar síðastliðið vor.

Það var Baldvin Már Guðmundsson í Búðardal sem ýtti undirskriftasöfnuninni úr vör. Byrjað var að safna undirskriftum á laugardaginn, 15. ágúst og segir hann vel hafa gengið það sem af er. „Það eru allir tilbúnir að skrifa undir, það eru alveg hreinar línur,“ segir Baldvin í samtali við Skessuhorn. Gengið verður með listann á öll heimili í Dalabyggð til að safna undirskriftum, en auk þess liggur hann frammi í KM þjónustunni í Búðardal. „Við stefnum á að ljúka undirskriftasöfnun ekki seinna en á mánudag og koma listanum til Samkaupsmanna sama dag, eða í síðasta lagi á þriðjudag. Þeir eru með stjórnarfund 26. þessa mánaðar og það væri gott ef þeir væru búnir að fá listann áður,“ segir Baldvin, en það eru sem kunnugt er Samkaup sem eiga og reka bæði Kjörbúðir og Krambúðir landsins.

Fjórðungi hærra verð

Eins og greint var frá í Skessuhorni undir lok júlí fjallaði byggðarráð Dalabyggðar um breytingu á verslun Samkaupa úr Kjörbúð í Krambúð á fundi 23. júlí. Í þeirri umfjöllun kom fram að verðsamanburður hefði leitt það í ljós að vörukarfa með 52 vöruliðum hefði hækkað um 25% eftir breytinguna. Sá verðsamanburður byggði á kvittunum frá Kjörbúðinni í apríl síðastliðnum og verðmerkingum á hillum í verslun Krambúðarinnar í Búðardal seint í júní. Fyrir breytingarnar höfðu Samkaup boðað að vöruverð myndi hækka um 7,7%. Þá má einnig geta þess að í verðkönnun verðlagseftirlits ASÍ í lok júní var Krambúðin oftast með hæsta verðið, eða í 51 tilviki af 52.

Byggðarráð Dalabyggðar skoraði í lok júlí á Samkaup að endurskoða verðlagningu í verslun sinni í Búðardal og nú hafa íbúarnir tekið til sinna ráða og hafið undirskrifasöfnun.

Dalamenn safna undirskriftum og vilja Kjörbúðina aftur