Gríðarstórt flóð sem bar með sér jökulleir hljóp úr vestanverðum Langjökli síðdegis á mánudaginn og í fyrrinótt. Leitaði flóðið sér farvegs um Svartá, sem alla jafnan er uppþornaður árfarvegur, sem rennur sunnan við Hafursfell, og þaðan í Hvítá ofan við ármót Hvítár og Geitár, ofan við Húsafell. Samkvæmt rennslismæli sem er við Kljáfoss við Hurðarbak nær þrefaldaðist rennsli árinnar, fór úr 95 rúmmetrum á sekúndu um miðjan dag á mánudag í 257 rúmmetra þegar hlaupið náði hámarki klukkan 2 aðfararnótt þriðjudags. Áin er svo aftur komin í rúmlega 80 rúmmetra rennsli um hádegisbil í gær, þriðjudag. Svo mikill var vatnsflaumurinn að litlu mátti muna að áin næði trébrúnni yfir Hvítá ofan við Húsafell. Í gærmorgun var áin enn eins og sementslituð og víða mátti sjá aur og sand á bökkum hennar. „Áin var í rauninni eins og fljótandi steypa þegar ég sá hana í gærmorgun,“ sagði Kristrún Snorradóttir á Laxeyri sem rekur veitingastaðinn við Hraunfossa.

Ekki liggur fyrir hvaðan úr Langjökli vatnið kom. Til stendur að fljúga yfir svæðið í dag þegar búist er við að flugfært verði og gott útsýni yfir möguleg upptök flóðsins. „Frá árinu 2004 höfum við ekki séð ámóta stórt sumarflóð í Hvítá,“ staðfesti Kristjana G Eyþórsdóttir, sérfræðingur á vatnasviði Veðurstofu Íslands í samtali við Skessuhorn.

Hér má sjá skjámynd af rennslismælinum við Kljáfoss.

Þessi mynd er tekin við Barnafoss, þegar flóðið var í rénun í gærmorgun. Ljósm. ÞMK.

Loftmynd tekin af Hvítá við vegamótin á Kaldadal í gær. Glöggt má sjá hvað áin er margfalt meiri um sig en venja er til. Ljósm. AB.

Svona var liturinn á Borgarfirði í gær, horft af Borgarfjarðarbrú. Aurframburðurinn er mikill og fjörðurinn jökullitaður. Ljósm. ÞR.

Stór spýja hljóp fram Hvítá og rennsli árinnar nær þrefaldaðist