Landssamtök sauðfjárbænda hafa gefið út leiðbeiningar vegna gangna og rétta vegna COVID-19 hættustigs almannavarna. Leiðbeiningarnar voru unnar í samstarfi almannavarna, sóttvarnalæknis, Landssamtaka sauðfjárbænda, Bændasamtaka Íslands og Sambands íslenskra sveitarfélaga. „Um er að ræða almennar leiðbeiningar um framkvæmd á göngum og réttum. Það er síðan á ábyrgð sveitastjórnar, sem fer með stjórn fjallskilamála, að tryggja að reglum um sóttvarnir sé fylgt eftir og gefa út frekari leiðbeiningar ef þurfa þykir. Áhersla er lögð á að hver og einn beri ábyrgð á eigin athöfnum og að: „Við erum öll almannavarnir“.

Í þessum leiðbeiningum kemur m.a. fram að vegna fjöldatakmarkana er mælst til þess að gestir komi ekki til réttarstarfa. Því verður fylgt strangt eftir að við réttarstörf séu ekki fleiri en 100 manns. Það mun leiða af sér verulega breytingu á fjölmennustu og stærstu réttum, þar sem fjöldi bæja sem á fé er hvað mestur. Í leiðbeiningunum segir jafnframt að allir sem taka þátt í göngum og réttum skulu hlaða niður smitrakningarappi almannavarna og vegna smitvarna er mælst til þess að áfengi verði ekki haft um hönd. Fjallaskálar/húsnæði sem notað er við göngur verða eingöngu opin fyrir smala og þá sem hafa hlutverk í göngum/leitum þann tíma sem göngur/leitir standa yfir. Ábyrgðaraðili fjallskila tryggir í samvinnu við rekstraraðila húsnæðis að svo megi verða.

Sjá leiðbeiningarnar hér:

LS gefur út leiðbeiningar vegna gangna og rétta í haust