Tæpur þriðjungur þeirra sem keyptu fasteign á fyrri helmingi ársins voru að kaupa sína fyrstu eign. Hefur hlutfall fyrstu kaupenda aldrei verið hærra, að því er fram kemur í mánaðarskýrslu hagdeildar Húsnæðis- og mannvirkjastofnunar. Niðurstöður nýrrar viðhorfskönnunar benda enn fremur til þess að um fjórðungur þeirra sem enn búa enn í foreldrahúsum séu í fasteignahugleiðingum.

Á sama tímabili hefur íbúðum í sölu á höfuðborgarsvæðinu fækkað. Þær voru um 2000 í maí en eru 1700 nú. Framboðið hefur sömuleiðis dregist saman á landsbyggðinni. Meðalsölutími nýrra íbúða dróst saman um 32% á landsbyggðinni á fyrri helmingi ársins, samanborið við fyrri helming síðasta árs. Meðalsölutími nýrra íbúða lengist lítillega á höfuðborgarsvæðinu, en hins vegar styttist meðalsölutími annarra íbúða.

Aldrei fleiri ný lán hjá bönkunum

Júní síðastliðinn var umsvifamesti einstaki mánuðurinn í hreinum nýjum íbúðalánum hjá bönkunum. Alls var í júní lánaður ríflega 31 milljarður króna í hrienum óverðtryggðum íbúðalánum á breytilegum vöxtum hjá bönkunum, að frádregnum uppgreiðslum. Ný óverðtryggð útlán bankanna á föstum vöxtum voru hins vegar neikvæð um þrjá milljarða, en frá því í október á síðasta ári hafa ný slík lán verið mánaðarlega í minna mæli en uppgreiðslur í þeim lánaflokki. Á sama tíma voru uppgreiðslur verðtryggða lána einnig um það bil einum milljarði króna umfram ný útlán til heimilanna hjá bönkunum.

Útlán lífeyrissjóðanna dragast enn saman, líkt og í apríl og maí og ný íbúðalán þeirra voru í fyrsta sinn lægri að fjárhæð en uppgreiðslur eldri lána hjá sjóðunum, m.v. tölur Seðlabanka Íslands sem ná aftur til ársins 2008. Var júnímánuður sá umsvifaminnsti innan lífeyrissjóðanna frá upphafi mælinga. Mikil útlánaaukning bankanna upp á síðkastið er rakin til mikilla vaxtalækkana undanfarinna mánaða, að því er fram kemur á vef HMS.

Leigusamningum fjölgar

Leiguverð á höfuðborgarsvæðinu lækkaði annan mánuðinn í röð samkvæmt vísitölu HMS. Tólf mánaða hækkunartaktur leiguverðs á höfuðborgarsvæðinu hefur farið hratt lækkandi frá fyrstu þremur mánuðum ársins. Sömu sögu er hins vegar ekki að segja um leiguverð í nágrenni höfuðborgarsvæðisins og á öðrum svæðum landsbyggðarinnar.

Þinglýstum leigusamningum fyrir íbúðarhúsnæði hefur fjölgað mikið milli ára, en þeir voru 16% fleiri á höfuðborgarsvæðinu en á fyrri hluta síðasta árs, 15% fleiri í nágrannsveitarfélögum borgarinnar og 17 fleiri á öðrum svæðum á landsbyggðinni.

Aldrei hærra hlutfall fyrstu kaupa