medium

large

thumbnail

1536x1536

small

custom-size

Kálfafjós í byggingu á Litla Kroppi

Þema ljósmyndasamkeppni er gleði

2048x2048

Bæjarsjóður Akraneskaupstaðar gerður upp með 319 milljóna króna hagnaði

Gleðilegt sumar!

Grásleppusjómenn fagna lengingu veiðitímabilsins – myndasyrpa

Hlynur Blær gefur bílum nýjan blæ

core/freeform

Samgöngu- og sveitarstjórnarráðuneytið hefur tilkynnt Borgarbyggð að ráðuneytið telji ástæðu til að taka stjórnsýslu sveitarfélagsins til formlegrar umfjöllunar og gefa út leiðbeiningar/álit um lögmæti athafna þess. Bréf þess efnis rita Hermann Sæmundsson og Stefanía Traustadóttir, starfsmenn ráðuneytisins, fyrir hönd ráðherra, 4. ágúst sl. Tilefni væntanlegrar umfjöllunar er erindi sem Málflutningsstofa Snæfellsness ehf., lögfræðistofa Péturs Geirssonar eiganda Hótel Borgarness ehf., sendi ráðuneytinu. Þar koma fram ávirðingar um meinta ólögmæta stjórnsýslu sveitarfélagsins vegna óforsvaranlegra tafa við afgreiðslu á erindi Péturs sem sent var sveitarfélaginu 19. febrúar 2019, ítrekað 29. janúar 2020 og aftur 17. febrúar 2020. Mál það snýst um skerðingu á lóð við Egilsgötu 11 í Borgarnesi sem nú er í eigu Hótels Borgarness ehf. Með vísan til sveitarstjórnarlaga óskaði ráðuneytið eftir umsögn sveitarfélagsins um efni kvörtunarinnar eigi síðar en 5. júní sl. og ítrekaði ráðuneytið beiðnina með tölvupósti til framkvæmdastjóra sveitarfélagsins 9. júlí sl. Þann 20. júlí sl. barst ráðuneytinu afrit af svarbréfi sveitarfélagsins til aðila málsins sem dagsett var 5. júní sl., en umsögn sveitarfélagsins um efni kvörtunarinnar hefur ekki ennþá borist ráðuneytinu, segir í bréfi ráðuneytisins.

Í bréfi ráðuneytisins til Borgarbyggðar segir orðrétt: „Ráðuneytið hyggst beina sjónum sínum að því hvort að stjórnsýsla sveitarfélagsins hafi verið í samræmi við meginreglur stjórnsýsluréttar og/eða vandaða stjórnsýsluhætti, m.a. regluna um forsvaranlegan málshraða og leiðbeiningarskyldu stjórnvalda.“ Í bréfinu segir einnig að eftir yfirferð á gögnum málsins og í ljósi þess að ráðuneytinu hafi borist fleiri ábendingar sem varða stjórnsýslu sveitarfélagsins er varða annmarka á málsmeðferð erinda sem berast umhverfis- og skipulagssviði sveitarfélagsins, telji ráðuneytið ástæðu til að taka stjórnsýslu Borgarbyggðar til formlegrar umfjöllunar og gefa út leiðbeiningar/álit um lögmæti athafna sveitarfélagsins.

Óskar ráðuneytið eftir skýringum á því hvort sveitarfélagið telji að stjórnsýsla sveitarfélagsins í umræddu máli hafi verið í samræmi við meginreglur stjórnsýsluréttar og spyr hvernig gætt sé þess að erindum sem beint er til sveitarfélagsins sé svarað í samræmi við meginreglur stjórnsýsluréttar um forsvaranlegan málshraða og með þeim hætti að leiðbeiningarskyldu sveitarfélagsins sé fullnægt. Að endingu er Borgarbyggð veitt færi á að koma að frekari umsögn málsins telji sveitarfélagið ástæðu til. Skulu umbeðnar upplýsingar berast í síðasta lagi 20. ágúst nk.

<strong>Vinna í gangi við að bæta verklag</strong>

Skessuhorn leitaði viðbragða Borgarbyggðar við ákvörðun ráðuneytisins. Þórdís Sif Sigurðardóttir sveitarstjóri varð fyrir svörum: „Borgarbyggð hefur móttekið erindið og mun að sjálfsögðu bregðast við eins fljótt og auðið er,“ segir Þórdís Sif. „Mikil ferlagreining hefur átt sér stað á umhverfis- og skipulagssviði Borgarbyggðar síðastliðna mánuði með það að leiðarljósi að bæta verklag og skilvirkni stjórnsýslunnar sem snýr að þeim málefnum sem falla undir það svið. Byggðarráð samþykkti á fundi sínum 9. júlí síðastliðinn að hefja markvissa vinnu við endurskoðun og uppsetningu á núverandi skipuriti sveitarfélagsins og áætlað er að niðurstöður úr þeirri vinnu liggi fyrir núna í lok ágúst. Í þeirri vinnu er verið að taka heildstæða nálgun á þjónustu sveitarfélagsins og greina hvort og þá hvar þurfi að gera breytingar til umbóta. Í þessu samhengi er þá helst verið að horfa til verkferla, skilvirkni og mannauðsmála,“ segir Þórdís Sif.

Hún segir að Borgarbyggð hafi sett sig í samband við ráðuneytið vegna bréfsins og muni að sjálfsögðu sýna fullan samstarfsvilja til að bæta stjórnsýslu sveitarfélagsins. „Við tökum öllum ábendingum vel og erum alltaf til í að gera betur og munum leitast við að innleiða það í stjórnsýslu sveitarfélagsins, enda er það í samræmi við þau skref sem sveitarfélagið er að stíga eins og að framan greinir,“ segir Þórdís Sif Sigurðardóttir sveitarstjóri.

Sveitarstjórnarráðuneytið boðar umfjöllun um stjórnsýslu