Umferð um hringveginn var 13% meiri í júlí en í júní síðastliðinum. Hún var hins vegar 3,4% minni en í júlí á síðasta ári. Þetta kemur fram í samantekt Vegagerðarinnar. Aukningin milli mánaða er einkum talin vera vegna aukins sumarfrísaksturs landsmanna, en ferðamönnum fjölgaði einnig hérlendis milli mánaða og umferð þeirra um þjóðvegina þar með. Engu að síður er útlit fyrir miklu minni umferð í ár en í fyrra og gæti samdrátturinn numið allt að tíu prósentum, að því er fram kemur á vef Vegagerðarinnar.

Þegar nýliðinn júlímánuður er borinn saman við sama mánuð í fyrra reyndist samdrátturinn mestur á Austurlandi, eða 8,3%. Minnst dróst hún saman á og við höfuðborgarsvæðið, eða um 0,9% og næstminnst á Vesturlandi, eða um 3,6%. Þegar litið er til einstakra mælistaða er aðeins einn slíkur þar sem umferðin var meiri í júlí síðastliðnum en í sama mánuði í fyrra. Það er Hellisheiði, þar sem umferðin jókst um 0,4%. Mestur samdráttur mældist á Mývantsheiði, eða 26,3%.

Það sem af er ári er umferð 12,1% minni en á sama tímabili á síðasta ári. Er þetta mesti samdráttur sem hefur mælst miðað við árstíma og nær tvöfalt meiri en milli áranna 2010 og 2011, þegar umferð dróst saman um 6,2% á sama tímabili. Mest hefur umferð minnkað á Austurlandi frá áramótum, eða um 25,8% en minnst á höfuðborgarsvæðinu eða um 5,8%. Næstminnst hefur umferð dregist saman á Vesturlandi frá áramótum, eða um 16,2%.

Einu gildir hvaða vikudaga er litið til, umferð hefur dregist saman alla daga vikunnar frá áramótum þegar miðað er við sama tímabil og í fyrra. Mestur er samdrátturinn á sunnudögum, eða 17,1% en minnstur á þriðjudögum, eða 11,3%.

Ekki er búist við því að umferð aukist í neinum mánuði þar sem eftir lifir ársins, að því er fram kemur á vef Vegagerðarinnar og reiknað er með um tíu prósenta samdrætti á ársgrundvelli, sem fyrr segir. Gangi það eftir verður það mesti samdráttur sem mælst hefur frá því þessi samantekt Vegagerðarinnar hófst og tvöfalt meiri samdráttur en áður hefur mælst.

Meiri umferð í júlí en júní – útlit fyrir samdrátt á ársgrunni