Skýra betur reglur um samkomutakmarkanir

Heilbrigðisráðherra hefur ákveðið, að tillögu sóttvarnalæknis, að gera breytingar á auglýsingu þeirri sem tók gildi 31. júlí síðastliðinn. Breytingarnar lúta að því að gera auglýsingu nr. 758/2020 skýrari. Í fyrsta lagi er gerð sú breyting að skýrt verður hversu mörgum viðskiptavinum sé heimilt að vera inni í matvöruverslunum. Þeir mega mest vera 100. Þó er verslunum sem eru yfir 1000 fermetrar heimilt að hleypa inn til viðbótar einum viðskiptavinir fyrir hverja 10 fermetra umfram þúsund. Í öðru lagi verður kveðið skýrt á um að nota skuli andlitsgrímu í almenningssamgöngum vari ferð lengur en 30 mínútur. Einnig er gert skýrt á ný hversu margir gestir séu leyfilegir á sund- og baðstöðum, en um sömu reglu er að ræða og gilti fyrr í sumar. Loks er lagt til að ekki verði heimilt að veita tímabundið leyfi fyrir tilteknum skemmtunum sem ætla megi að dragi að sér hóp fólks eftir kl. 23:00.

Auglýsing þessi hefur verið send Stjórnartíðindum til birtingar og hefur sama gildistíma og auglýsing nr. 758/2020, þ.e. til 13. ágúst.

Líkar þetta

Fleiri fréttir