Á fundi byggðarráðs Dalabyggðar síðastliðinn fimmtudag var til umfjöllunar matvöruverð í einu matvöruversluninni í Búðardal. Eftir að verslun Samkaupa var breytt úr Kjörbúð og í Krambúð í maí síðastliðnum hefur verðsamanburður sýnt að vörukarfa með 52 vöruliðum hefur hækkað um 25%. Því má bæta við að í verðkönnun sem verðlagseftirlit ASÍ birti í lok júní á matvöru á landsvísu var Krambúðin oftast með hæsta verðið, eða í 51 tilviki af 121.

Í bréfi til Samkaupa ítrekar sveitarstjórn Dalabyggð áskorun sína um að endurskoða verðlagningu í versluninni í Búðardal. Samkaup hafði gefið það út fyrir breytingu á versluninni í vor að vöruverð myndi hækka um 7,7% við breytinguna, en nú er sýnt að hækkunin er margfalt meiri í prósentum talið. Fram kemur í fundargerð byggðarráðs að í svari frá forstjóra Samkaupa komi fram að hann sé ekki sammála þeirri niðurstöðu sem verðsamanburðurinn sýnir. Einnig að hann muni leggja til að stjórn Samkaupa fjalli um málefni verslunarinnar í Búðardal á fundi sínum í lok ágúst.

Í verðsamanburði sem byggðarráð Dalabyggðar leggur til grundvallar voru borin saman verð á kvittunum frá Kjörbúðinni í apríl síðastliðnum og verðmerkingar á hillum í Krambúðinni 24. júní síðastliðinn. „Það er himinn og haf á milli 25% hækkunar vöruverðs og 7,7% hækkunar, sem hefði þó verið meira en nóg. Sveitarfélagið Dalabyggð lýsir verulegum vonbrigðum yfir því sem hér hefur gerst og að verð virðist hafa hækkað svo hrikalega umfram það sem forsvarsmenn Samkaupa höfðu áætlað. Að geta verslað í heimabyggð er hluti af grunnþjónustu sem skiptir miklu máli í almennum lífskjörum íbúa í sveitarfélaginu og þetta kemur mest niður á þeim sem hafa ekki kost á að fara annað til að versla. Það er nauðsynlegur hluti í grunnþjónustu í hverju samfélagi að geta verslað í heimabyggð en það verður að vera gert með þeim hætti að fólki sé kleift að nýta sér þjónustuna. Dalabyggð ítrekar áskorun sína til Samkaupa að endurskoða verðlagningu í versluninni í Búðardal.“

Fjórðungs hækkun matvöruverðs eftir að Kjörbúð varð Krambúð