Tveir skipverjar flutningaskipsins Seaboss, sem lagðist að bryggju á Grundartanga í gær hafa greinst með Covid-19. Dvelja þeir nú í sóttvarnarhúsinu við Rauðarárstíg í Reykjavík. Þrír skipsfélagar þeirra dvelja þar einnig, vegna nálægðar við hina smituðu. Morgunblaðið greindi frá. Skipverjar á Seaboss fóru í skimun við kórónaveirunni vegna áhafnaskipta eftir að skipið kom hingað til lands. Það var þá sem kom í ljós að tveir þeirra reyndust smitaðir.

Skipverjar flutningaskipa eru undanþegnir fyrirmælum um sóttkví, sé stoppað stutt við á landinu. Aftur á móti er áhöfnum sem undirgangast áhafnaskipti hér á landi skylt að fara í skimun, eins og áhöfn Seaboss gerði. „Þetta gildir um skipverja sem koma hér, afhenda vöru og eru auðvitað að stoppa stutt, kannski fara rétt í land og halda síðan aftur um borð og fara. Við höfum ekki sótt á þá,“ er haft eftir Víði Reynissyni, yfirlögregluþjóni almannavarnardeildar ríkislögreglustjóra, í Morgunblaðinu í dag. Ekki væri hægt að afhenda vörur til Íslands ef allir skipverjar þyrftu að dvelja í sóttkví.

Vert er að geta þess að ef áhafnarmeðlimir flutningaskipa eru útsettir fyrir smiti þrátt fyrir varúðarráðstafanir vinnuveitenda falla þeir ekki lengur undir undanþáguskilyrðin, að því er segir um undanþágur frá kröfum um sóttkví fyrir skipaáhafnir á vef Landlæknisembættisins.

Allt í góðu þegar skipið kom

Hafnsögumaður á vegum Faxaflóahafna fór um borð í skipið við komu þess til landsins í síðustu viku. Að sögn Gísla Gíslasonar hafnarstjóra reyndist allt í góðu lagi þá. Eftir að skipið lagðist að bryggju var síðan skipt um áhöfn. „Þegar nýja áhöfnin er að koma kemur þetta upp,“ segir Gísli í samtali við Skessuhorn, en bætir því við að allt eigi að vera í lagi um borð í skipinu núna og þar hafi hreinsunaraðgerðir staðið yfir.

Brottför Seaboss frá Grundartanga er áformuð síðar í dag og Gísli segir að meta þurfi stöðuna þegar kemur að því að senda hafnsögumann um borð þegar skipið fer. „Það eru ákveðnar reglur sem gilda ef við setjum mann um borð, ef tvísýnt er þá eru menn í hlífðargalla. En mér sýnist að það eigi ekki að vera neitt vandamál,“ segir hafnarstjórinn.

Tvö smit greindust við áhafnaskipti flutningaskips