Alþjóðlega kvikmyndahátíðin Iceland Documentary Film Festival var haldin á Akranesi 15.-19. júlí. Þetta var í annað sinn sem hátíðin er haldin en til hennar var stofnað af þeim Ingibjörgu Halldórsdóttur, Heiðari Mar Björnssyni og Halli Erni Árnasyni. Boðið var upp á fjöldan allan af fjölbreyttum heimildamyndum en auk þess voru kvöldvökur, barnadagskrá, tónlistardagskrá, jóga og fleira. Allar myndir á sýningunni voru að þessu sinni sýndar í Bíóhöllinni.

Þrátt fyrir að hátíðinni sé formlega lokið heldur hún á fram, heima í stofu, því flestar myndir sem sýndar voru á hátíðinni eru nú aðgengilegar á netinu. Sjá nánar á: www.icedocs.is

Að venju var valin besta heimildamyndin. Það var Collective eftir rúmenska leikstjórann Alexander Nanau. Í umsögn dómnefndar um myndina segir að Collective fari alveg nýja leið að viðkvæmum efnistökum sem eru spilling og litilsvirðing við mannslíf. „Sagan er ekki sögð með texta eða sögumanni og það er bara efnið sjálft sem segir hana. Leikstjórinn grefur djúpt ofan í hneyksli í Rúmeníu þegar næturklúbburinn Collectiv brann og fjöldi manns létust,” segir í umsögn dómnefndar.

Sérstaka viðurkenningu dómnefndar hlaut myndin Scheme Birds en hún er frumraun leikstjóranna Ellen Fiske og Ellinor Hallin og er tilfinningalega hrátt portrett af ungri skoskri konu af verkamannastétt tekin frá ljóðrænu sjónarhorni. Besta stuttmynd hátíðarinnar var Carne eftir brasílíska leikstjórann Camila Kater. Hún er tilraunakennd mynd sem notast við marga miðla til að segja sögur af hlutgervingu kvenlíkamans og hvernig virði líkamanna breytist á mismunandi lífsskeiðum.

Dómnefnd hátíðarinnar þettar árið skipuðu þær Marina Richter kvikmyndagagnrýnandi og Anna Zamecka kvikmyndagerðarmaður. Það voru svo kvikmyndagerðarmennirnir Gunnar Eggertsson, Anka Paunescu og Yrsa Roca Fannberg sem voru í dómnefnd stuttmynda. „Hátíðin gekk vel fyrir sig þrátt fyrir óvenju djúpa lægð sem gekk yfir landið á sama tíma og mun án efa skipa stóran sess í hjörtum kvikmyndagerðar- og áhugafólks ef fram heldur sem horfir,“ segir í tilkynningu.

Lokahóf IceDocs og grillveisla var á sunnudagskvöldinu í bláa beitningarskúrnum á Breið, þar sem verðlaun fyrir bestu myndirnar voru veitt og tónleikar haldnir með Between Mountains. Þessir glæsilegu verðlaunagripir voru afhentir. Ljósm. Heiðar Mar Björnsson.

Collective var valin besta heimildamyndin á IceDoc