Aflaheimildir til strandveiða hafa verið auknar um 720 tonn á þessu fiskveiðiári. Verður heildaraflamark strandveiða því 11.820 tonn í ár og hefur aldrei verið meira. Kristján Þór Júlíusson, sjávarútvegs- og landbúnaðarráðherra, hefur undirritað reglugerð þess efnis. Með þessari viðbót er ætlunin að koma til móts við mikla fjölgun báta sem róið hefur verið til strandveiða á þessu ári.

Landssamband smábátaeigenda ritaði ráðuneytinu bréf 26. maí þar sem sambandið sagði líkur á að aflamarkið sem upphaflega var ætlað til strandveiða á þessu fiskveiðiári, 11.100 tonn, myndi ekki duga til að veiðar gætu staðið út ágústmánuð eins og heimilt er samkvæmt lögum. Samkvæmt samantekt atvinnuvega- og nýsköpunarráðuneytisins eru taldar líkur á að upphaflegt aflamark muni klárast um komandi mánaðamót. Komi slík staða upp þarf Fiskistofa að stöðva veiðar. Í ljósi þess ákvað ráðherra að flytja allar óráðstafaðar heimildir innan 5,3% kerfisins svokallaða til að mæta aukinni ásókn í strandveiðar, að því er fram kemur í tilkynningu frá ráðuneytinu. Ráðherra hefur samkvæmt lögum engar frekari heimildir til að auka við aflamagn strandveiða á yfirstandandi fiskveiðiári.

Telja viðbótina duga skammt

Örn Pálsson, framkvæmdastjóri Landssambands smábátaeigenda, telur að 720 tonna viðbót ráðherra til strandveiða komi til með að duga skammt. Meira þurfi til að hægt verði að halda uppi veiðum út tímabilið, að því er segir á vef RÚV. Eðlilegt hefði verið að bæta við 1.700 tonnum. Strandveiðisjómenn hafi aldrei verið fleiri og allt að 200 tonn veiðst á degi hverjum. Miðað við aflabrögð undanfarið gæti viðbótin orðið til þess að hægt verði að róa á strandveiðum allavega tvær vikur í ágúst.

Aflaheimildir til strandveiða hafa ekki verið fullnýttar undanfarin tvö ár og hefur LS talað fyrir heimild til flutnings 15% heimildanna á milli ára. Því lýsti Örn til að mynda í viðtali í sjómannadagsblaði Skessuhorns nú í vor, sem og í samtali við RÚV þriðjudaginn 21. júlí. „Þá hefðum við verið með 1.700 tonn sem hefðu bæst við. Og einnig á síðasta ári vorum við með 1.000 tonnum meira í þorski þannig að við eigum aðeins aðeins í land með að ná því sem við töldum að ætti að bætast við og vera aflaviðmiðið á þessu fiskveiðiári,“ hefur RÚV eftir Erni Pálssyni.

Bætt við strandveiðikvótann