Kærunefnd jafnréttismála hefur komist að þeirri niðurstöðu að Þjóðkirkjan hafi brotið gegn jafnréttislögum þegar sóknarprestur var skipaður í Garða- og Saurbæjarprestakalli á síðasta ári. Nefndin segir í úrskurði sínum að Þjóðkirkjan hafi ekki sýnt fram á að önnur sjónarmið en kyn umsækjenda hafi ráðið úrslitum um hver var valinn sóknarprestur. Í yfirlýsingu frá Biskupsstofu vegna þessarar niðurstöðu segir að Þjóðkirkjan muni draga af úrskurði kærunefndar lærdóm og unnið verði að tillögum um umbætur. Skipað var í stöðu sóknarprests í fyrra þegar prestar voru enn embættismenn. Í úrskurðinum segir að kirkjan hefði þurft að sýna fram á að önnur sjónarmið en kynferði hefðu ráðið niðurstöðunni. Það hefði kirkjan ekki gert. Því var niðurstaðan sú að brotið hefði verið gegn lögum um jafnan rétt kynjanna.

Það var Úrsúla Árnadóttir, sem nú starfar sem sóknarprestur á Blönduósi, sem lagði fram kæruna. Hún var einn umsækjanda um starf sóknarprests Garða- og Saurbæjarprestakalls og kærði þá niðurstöðu kjörnefndar að velja Þráinn Haraldsson í stöðu sóknarprests. Matsnefndin telur Úrsúlu búa yfir meiri starfsreynslu sem prestur innan kirkjunnar en Þráinn og hefði auk þess meiri menntun. Þá hefði hún fengið einkunnina 8,9 hjá matsnefnd sem fór yfir menntun og feril umsækjenda en Þráinn 8,2 og annar karlmaður sem sótti um 9,0. Gagnrýnir hún að meirihluti kjörnefndar væru samstarfsfólk Þráins sem verið hafði prestur í prestakallinu í fjögur ár áður en hann var ráðinn sóknarprestur. Aðrir umsækjendur mættu hins vegar ekki hafa samband við kjörnefndarmenn í ferlinu.

Kærunefnd jafnréttismála segir í úrskurði sínum frá 9. júlí að leynileg atkvæðagreiðsla kjörnefndar hafi gert að verkum að ekki sé hægt að ráða fram úr hvort byggt hafi verið á sjónarmiðum um kynferði þegar prestur var valinn.

Úrsúla Árnadóttir segir í samtali við Skessuhorn að þetta hafi verið í annað skipti sem hún sækti um stöðu í prestakallinu, en án árangurs. Í febrúar 2020 var ráðið í tvær stöður presta í Garða- og Saurbæjarprestakalli og þá var enn og aftur gengið framhjá henni. Hún kveðst aldrei hafa fengið hreinskiptin svör um hverju þessi sniðganga í hennar garð sætti. „Ég er tilbúin að funda með Agnesi M Sigurðardóttur biskupi í kjölfar þessa úrskurðar kærunefndar jafnfréttismála, en til þess fundar hefur hins vegar ekki enn verið boðað. Ég hef ekki heyrt neitt frá biskupi og Þjóðkirkjan hefur ekki gert neina tilraun til sátta í málinu né hefur reynt að friða hug minn þrátt fyrir afgerandi úrskurð þess efnis að brotið hafi verið á réttindum mínum a.m.k. í tvígang. En ég fagna afdráttarlausum úrskurði kærunefndarinnar,“ segir Úrsúla.

Ath.s: Fréttin var uppfærð kl. 09:15.

Þjóðkirkjan braut gegn jafnfréttislögum