Í Bókasafninu á Akranesi stendur yfir sýning þar sem Arnþór Ingibergsson sýnir handverk sitt, tálgaða fugla. Arnþór er fæddur og uppalinn í Reykjavík en flutti á Akranes árið 1976 ásamt Guðrúnu eiginkonu sinni. Saman eiga þau tvö börn og fimm barnabörn. Guðrún er ættuð frá Innra-Hólmi og ákváðu þau hjónin að prófa að búa á Akranesi í eitt ár en þar búa þau enn 44 árum síðar. Arnþór er húsasmíðameistari og á námsárunum tók hann m.a. þátt í að reisa Hallgrímskirkjuturn. Um langt skeið vann hann við smíðar hjá Sambandi íslenskra samvinnufélaga. Eftir að fjölskyldan flutti á Akranes vann Arnþór hjá Akraneskaupstað við smíðar og húsvörslu þar til hann lét að störfum fyrir fimm árum og fór á eftirlaun.

Gott að hafa eitthvað fyrir stafni

„Við eigum sumarbústað í Borgarfirði og höfum verið að grisja birki þar í kring. Ég prófaði að tálga úr því ýmsar fígúrur en hefur mér fundist skemmtilegast að eiga við fuglana. Það er gott að tálga úr birkinu vegna þess hversu mjúkt það er.“ Aðspurður segist Arnþór hafa nokkurn áhuga á fuglum. „Ég er enginn sérfræðingur en mér þykir gaman að fylgjast með þeim og hegðun þeirra.“ segir hann. En á hann sinn uppáhalds fugl? „Nei ég get ekki sagt það en ég hef gert mest af lóu, lunda og krumma en á safn af ýmsum öðrum tegundum.“ En hversu lengi er hann að vinna hvern fugl? „Ég hef ekki tekið tímann en gæti trúað að það taki mig tvo til þrjá klukkutíma að tálga hvern fugl, síðan er talsverð eftirvinna við að mála, búa til lappir og undirstöður,“ svarar hann.

Fuglarnir sem hann tálgar eru unnir af mikilli nákvæmni og eru líkindin með fyrirmyndunum alveg ótrúleg. Aðspurður segist Arnþór þó ekki skilgreina sig sem listamann. „Ég hef ekki litið á mig sem listamann og ekki lært neitt í sambandi við slíkt,“ segir hann og hlær. „Ég hef verið aðeins að mála myndir og smíða lítil hús og kirkjur, en nei ég er ekki listamaður,“ segir hann. Hægt er að kíkja við á sýningunni hjá Arnþóri á bókasafninu á Akranesi á opnunartíma safnsins til og með 24. júlí næstkomandi.

Sýnir tálgaða fugla í Bókasafninu á Akranesi