Hreyfistöðvar voru formlega teknar í notkun í Garðalundi á Akranesi í blíðskaparveðri í dag. Um er að ræða samstarfsverkefni Akraneskaupstaðar og Íþróttabandalags Akraness en hreyfistöðvarnar í Garðalundi eru hluti af Heilsueflandi samfélagi á Akranesi. Settar voru upp ellefu hreyfistöðvar í Garðalundi og eru upplýsingaskilti við hverja stöð með góðum leiðbeiningum um þær æfingar sem hægt er að gera. Tilgangur verkefnisins er að auka hreyfingu íbúa og annarra gesta í skógræktinni.

Það voru sjúkraþjálfararnir Anna Sólveig Smáradóttir og Helga Sjöfn Jóhannesdóttir sem settu upp æfingarnar sem henta fólki á öllum aldri. Hildur Karen Aðalsteinsdóttir, framkvæmdastjóri ÍA, kynnti verkefnið fyrir gestum á opnunarathöfninni og Sævar Freyr Þráinsson bæjarstjóri opnaði stöðvarnar formlega. Að því loknu var veitt leiðsögn um hreyfistöðvarnar.

Hildur Karen Aðalsteinsdóttir, framkvæmdarstjóri ÍA, og Sævar Freyr Þráinsson, Bæjarstjóri Akraness, Helga Sjöfn Jóhannesdóttir og Anna Sólveig Smáradóttir. Ljósm. Skessuhorn/arg.

Hreyfistöðvar settar upp í Garðalundi á Akranesi