Í gær fór fram formleg opnun á Vínlandssetrinu í Búðardal og var dagskráin liður í bæjarhátíðinni Heim í Búðardal. Húsfyllir var við vígsluna og vel það, því margir hlustuðu á opnunarathöfn í sólinni utandyra. Meðal gesta var Katrín Jakobsdóttir forsætisráðherra, Jacob Isbosethsen sendimaður Grænlands á Íslandi, Jeffrey Gunter sendiherra Bandaríkjanna á Íslandi auk fulltrúa frá sendiherra Kanada á Íslandi. Kristján Sturluson sveitarstjóri Dalabyggðar bauð gesti velkomna og stýrði athöfnina. Að ræðuhöldum loknum klippti Katrín Jakobsdóttir forsætisráðherra á borðann og þar með var Vínlandssetur í Búðardal formlega opnað. Henni til aðstoðar við borðaklippinguna voru synir hennar tveir.

Sýningin í Vínlandssetrinu fjallar á fjölbreyttan hátt um landnám norrænna manna á Grænlandi og fund Ameríku löngu fyrir daga Kristófers Kólumbusar. Á sýningunni varpa ólíkir listamenn ljósi á ferðir forfeðra okkar til Grænlands og Vínlands. „Öll þessi saga getur sagt okkur margt um hver við erum því maður kynnist einmitt sjálfum sér best í samskiptum við aðra. Eiríks saga rauða og Grænlendinga saga snúast einmitt öðrum þræði um samskipti norrænna manna við þá sem bjuggu í þessum löndum,“ sagði forsætisráðherra m.a. við opnun setursins.

Vínlandssetrið er í hinu sögufræga húsi Leifsbúð skammt frá höfninni í Búðardal. Á efri hæð hefur verið komið fyrir myndverkum tíu íslenskra listamanna og í hljóðleiðsögn geta gestir fengið á ýmsum tungumálum sögu af landafundum norrænna manna á landnámsöld og meðal annars frásagnir af fundi Grænlands og Vínlands hins góða. Þessi saga tengist Dölunum sterkum böndum. Frá Eiríksstöðum í Haukadal hélt Eiríkur rauði árið 1000 í vesturátt og fann Grænland. Þaðan fór síðar sonur hans Leifur heppni og fann Ameríku fyrstur norræna manna. Á neðri hæðinni er veitingasala.

Hugmyndafræðingar að sýningunni í Leifsbúð eru Kjartan Ragnarsson og eiginkona hans Sigríður Margrét Guðmundsdóttir sem stofnuðu Landnámssetrið í Borgarnesi og hafa rekið það með myndarbrag allar götur síðan. Hugmyndin að Vínlandssetri byggir á reynslu þeirra og þekkingu frá rekstrinum í Borgarnesi. Að lokinni setningarathöfn í Leifsbúð héldu gestir til samsætis í Dalabúð þar sem Mjólkursamsalan bauð til veislu, flutt var tónlist og gestir ræddu saman.

Þess má að lokum geta að Mjólkursamsalan og Vínlandssetur bjóða öllum Dalamönnum 12 ára og eldri að koma og skoða sögusýninguna þeim að kostaðarlausu og gildir boðskort þar að lútandi út árið 2021.

Nánar í Skessuhorni næstkomandi miðvikudag.

Vínlandssetur formlega opnað í Búðardal