Verkefninu Upplifðu Ísland! var nýlega hleypt af stað, en verkefnið er átak sem á að hvetja landsmenn til að ferðast innanlands. Farið verður í fjögurra daga hringferðir umhverfis Ísland í þægilegri smárútu. Gist verður á hótelum Icelandair á Höfn í Hornafirði, Egilsstöðum og á Akureyri. Leiðsögumaður verður með í för og stoppað verður á fjölmörgum stöðum. Ferðirnar standa yfir í allt sumar. Bóka þarf ferðirnar með að minnsta kosti 48 klukkustunda fyrirvara og hægt er að nota ferðaávísun ríkisins við bókunina.

„Upplifðu Ísland verkefnið hefur hlotið frábærar viðtökur, enda um einstakt tækifæri að ræða til að skoða Ísland að afstöðnu því hléi á milljóna ferðamennsku sem senn færist aftur til fyrra horfs. Það að eiga þess kost að fara með svo frábærlega þægilegum og ódýrum hætti um landið er líka afar óvenjulegt ekki síst þegar litið er til þeirra gæða hótela og ökutækja sem um ræðir. Eru þá ótaldir þeir samfélagslegu þættir sem hér koma við sögu og tengjast bæði skógrækt, geðrækt og ljósmyndasamkeppni,“ Jakob Frímann Magnússon, einn af aðstandendum verkefnisins.

Ferðalöngum býðst að gróðursetja tré í Tómasarlundi á leiðinni, en það er verkefni sem tileinkað er tónlistamanninum Tómasi Magnús Tómassyni heitnum. Markmið verkefnisins er að hvetja fólk til að tileinka sér jákvætt, örvandi og uppbyggjandi hugarfar.

„Þetta er eitt af þeim verkefnum sem við höfum hleypt af stað til að efla ferðalög landsmanna innanlands og auka um leið vitund um landið okkar og náttúru,“ segir Ingibjörg Ásta Halldórsdóttir, markaðsstjóri Samkaupa, en fyrirtækið er eitt af styrktaraðilum verkefnisins. „Umhverfisvitund er okkur mikilvæg. Við viljum leggja okkar af mörkum til unhverfismála og hvetja fólk til að gera slíkt hið sama. Þess vegna ætlum við að gefa fólki tré þegar það mætir í ferðina, sem það má svo gróðursetja í Tómasarlundi,“ segir Ingibjörg Ásta.

Dagksrá ferðarinnar má finna á vefsíðunni https://upplifduisland.is

-fréttatilkynning

Hleyptu af stað hringferð um landið