Söngvararnir Svavar Knútur og Kristjana Stefáns leggja land undir fót og halda af stað um Vesturland í dag. júlímánuði og ætla að syngja dúetta og spila létta tónlist á vel völdum stöðum í landshlutanum. Tónleikaröðin ber það ljúfa heiti; Með faðmlög í farteskinu. Fyrstu tónleikar þeirra verða klukkan 20 í kvöld í gömlu kirkjunni í Stykkishólmi og í hádeginu á morgun í Flatey (sjá nánar í dagskrá hér að neðan).

„Tónleikarnir okkar eru afskaplega einfaldir og látlausir og við leikum okkur bara með dúettaformið og það sem við getum sjálf leikið á hljóðfæri og sungið saman. Efnisvalið er auðvitað afskaplega fjölbreytt, allt frá Páli Ísólfs til Abba, frá Fleetwood Mac til Sigfúsar Halldórs og Ingibjargar Þorbergs og allt þar á milli, enda erum við alltaf að finna einhverja skemmtilega snertifleti hjá hvert öðru í músík. Svo vill það nú brenna við hjá okkur að það dettur upp úr okkur alls konar vitleysa þegar við erum að kynna lögin og í anda sannra trúða, þá reynum við að koma sjálfum okkur á óvart eftir fremsta megni,“ segir Svavar Knútur í samtali við Skessuhorn.

Svavar og Kristjana sungu fyrst saman í Viðey árið 2008 þegar Kristjana var beðin um að finna einhvern listamann úr ólíkri átt til að gera tónleika með. Samstarfið gekk það vel að dúóið ákvað að gefa út plötuna Glæður árið 2011. „Samstarfið var svo óskaplega skemmtilegt að við ákváðum að gera það aftur, og svo aftur og aftur. Platan Glæður gekk svo rosalega vel þegar hún kom út að við höfum bara haldið áfram að eiga þetta skemmtilega sumarsamstarf á hverju ári. Það bætast alltaf við ný skemmtileg lög í prógrammið og fólk er alltaf að biðja okkur um að fá þau á plötu, svo við ákváðum að hræra bara í eina nýja plötu, en hún ber nafnið Faðmlög og verður einmitt með í för í þessari tónleikaferð,“ bætir hann við.

Svavar og Kristjana eru vel kunnug í landshlutanum og hafa til að myndað sungið á Landnámssetrinu í Borgarnesi, á Bjarteyjarsandi og Snæfellsnesi oftar en einu sinni. „Við höfum nú komið nokkrum sinnum við á Vesturlandi áður, enda eru bæði Landnámssetrið og Bjarteyjarsandur fastir liðir í ferðalögunum okkar, bæði saman og sitt í hvoru lagi. Þá höfum við nokkuð reglulega komið í Stykkishólm og sungið, bæði í kirkjunni og á Vatnasafninu, en nú langaði okkur að prófa að spila í gömlu kirkjunni, því hún er bráðfalleg. Svo vorum við bara einkar forvitin um félagsheimilið Brúarás, hvernig stemningin yrði þar.“

Aðspurður segist Svavar ætla að nýta ferðalagið til þess að skoða sig um í landshlutanum. „Við ætlum alveg örugglega að koma við hjá henni Jóhönnu vinkonu okkar á Háafelli og knúsa nokkrar geitur og jafnvel skella okkur í Kraumu í bað til að þvo af okkur ferðasótið. Þá er auðvitað ómissandi að kaupa afurðir af bændunum á Bjarteyjarsandi. Vesturlandið er náttúrulega krökkt af möguleikum og frábærum stöðum til að heimsækja. Við hlökkum endalaust til,“ segir Svavar fullur tilhlökkunar að lokum.

Hefja tónleikaferð sína um Vesturland í dag