Íslandsmeistararnir í KR gerðu góða ferð á Skagann þegar þeir unnu ÍA í 3. umferð úrvalsdeildar karla í knattspyrnu í gærkvöldi í fjörugum leik á Akranesvelli. Öll mörkin komu snemma í seinni hálfleik þrátt fyrir góð færi frá báðum liðum í þeim fyrri.

Fyrsta markið kom frá heimamönnum á 48. mínútu. Þeir gulklæddu áttu skyndisókn upp völlinn eftir dauðafæri frá KR sem Árni Snær markvörður ÍA varði. Upp úr því kom Viktor Jónsson boltanum inn á teig til Tryggva Hrafns Haraldssonar sem náði að snúa sér listilega og leggja boltann á Steinar Þorsteinsson sem lagði boltann í bláhornið. 1-0 fyrir Skagamönnum. Íslandsmeistararnir voru ekki lengi að svara fyrir sig því næsta mark kom strax á 53. mínútu. Eftir nokkrar hornspyrnur í röð frá KR og misheppnaðar tilraunir Skagamanna að hreinsa boltann úr eigin teig náði Aron Bjarki Jósepsson að nýta tækifærið fyrir þá röndóttu. Eftir smá klafs í teig ÍA náði Aron Bjarki að snúa sér og leggja knöttinn í mark heimamanna og jafnaði þannig metin, 1-1.

Eitthvað hefur einbeitingin farið úr Skagamönnum eftir jöfnunarmarkið því gestirnir skoruðu aftur á 61. mínútu. Eftir gott þríhyrningaspil endaði með því að Kristján Flóki Finnbogason lagði boltann fram hjá markverði Skagamanna og kom þannig KR yfir í fyrsta skipti í leiknum.

KR-ingar fengu gott tækifæri til að bæta í forskot sitt rétt undir lokin en vítaspyrnan sem þeir fengu á 84. mínútu fór forgörðum. Ekki urðu mörkin fleiri í leiknum og Íslandsmeistararnir með góð þrjú stig í vasanum og færa sig þannig yfir Skagamenn í deildinni.

Eftir þrjár umferðir er ÍA í 6. sæti með einungis einn sigur á meðan KR-ingar eru einu sæti fyrir ofan með 6 stig.

Næsti leikur ÍA er gegn Valsmönnum á Hlíðarenda. Leikurinn er á föstudaginn og hefst kl. 20:00.

Íslandsmeistararnir höfðu betur