Í síðustu viku kom út Borgfirðingabók, ársrit Sögufélags Borgarfjarðar, og vinna félagar nú að dreifingu hennar til áskrifenda. Meðfylgjandi texti er formáli bókarinnar:

„Segja má að okkur Íslendingum sé mikil og sérstæð ábyrgð á hendur falin um allt það, er lýtur að gæzlu þjóðlegra fræða,” ritar Guðmundur Böðvarsson í formála að Borgfirzkum æviskrám. Hefur þetta gæslustarf verið leiðarljós í þeirri starfsemi sem Sögufélag Borgarfjarðar hefur staðið fyrir. Borgfirðingabókin sem nú er komin út er 21. árgangur þess rits og hefur hún þróast frá því að vera eins konar yfirlit yfir starfsemi sveitarfélaga og frjálsra félaga á svæðinu, yfir í „gæzlu þjóðlegra fræða“ með því að birta frásagnir frá eldri tímum ásamt því að fjalla um markverða atburði úr samtímanum. Atburðir líðandi stundar eru jú einnig þjóðleg fræði og skrásetning þeirra getur geymt mikilvæga vitneskju fyrir komandi kynslóðir og tengt þannig fortíð við framtíð.

Eins og áður höfum við lagt okkur fram við að höfða til sem flestra, því reynum við að hafa fjölbreyttan hóp greinahöfunda og leggjum áherslu á að hver og einn haldi sínum einkennum í máli og stíl. Í þessari bók eru höfundar nálægt 25 talsins, í gegn um tíðina skipta þeir hundruðum. Sem fyrr hefur gengið afar vel að afla efnis og eigum við fyrningar sem gott er að geyma til næsta árs. Þökkum við kærlega öllum er lögðu lið fyrir óeigingjarnt starf. Oft er hugmyndum að efni í bókina stungið að ritnefndarfólki á förnum vegi, þá er alltaf einhver hætta á að hugmyndin glatist áður en hún kemst á efnislistann, vonum við að fólk veigri sér ekki við að minna okkur á ef ástæða virðist til.

Óhjákvæmilega hefur það verið sérstakt að koma þessari bók saman meðan heimsfaraldur ógnar nánast öllum jarðarbúum. Það hefur leitt hugann að hinum raunverulegu verðmætum og er þekking á menningu og sögu þar mikilvæg. Það er dýrmætt að vita hvernig fyrri kynslóðir tókust á við erfiðleika og ógnir og einnig hvernig þær nutu lífsins. Auðvitað er líka forvitnilegt að vita hvort þjóðfélagið taki varanlegum breytingum vegna þessa ástands, en það er á fárra færi að vita það nú.

Eins og komið hefur fram í fyrri Borgfirðingabókum er útgáfa þeirra bóka megin verkefni félagsins um þessar mundir. Þó erum við enn að gæla við að gefa út eitt íbúatal enn, en útgáfa þess var einmitt fyrsta verkefni Sögufélagsins. Kannað hefur verið hvort ný persónuverndarlög setji einhverjar hömlur á að birta þær upplýsingar sem áður hafa verið í íbúatölunum, svo virðist vera að enhverju leyti, þannig að ekki er ljóst hver endanleg ákvörðun verður. Þannig að enn um sinn einbeitir félagið sér að Borgfirðingabók. Áskrifendahópurinn fer heldur stækkandi og þökkum við mjög góðar viðtökur við bókinni. Hægt er að leita upplýsinga um útgefið efni Sögufélagsins og hvernig hægt er að nálgast það á fésbókarsíðu félagsins: Sögufélag Borgarfjarðar – Borgfirskar æviskrár. Einnig er hægt að hafa samband við ritnefndarfólk.

Að lokum vill félagið minnast Árna Guðmundssonar á Beigalda, en hann lést 1. ágúst 2019. Hann var einn af dyggum greinarhöfundum Borgfirðingabókar. Eftir hann er efni í fjölda þeirra, þar sem hann meðal annars fjallar á afar greinargóðan hátt um lífið einkum frá sínum yngri árum. Í síðustu bókinni, sem kom út skömmu áður en hann lést í hárri elli, fjallar hann um ættmenni sín og gaf lesendum þannig innsýn í lífið og tilveruna um aldamótin 1900 og áratugina þar í kring. Hafðu kæra þökk fyrir allt sem þú lagðir til samfélagsins.“

Borgfirðingabók er komin út