Víkingur Ólafsvík tók á móti núverandi bikarmeisturum Víkings Reykjavík á Ólafsvíkurvelli fimmtudaginn 25. júní síðastliðinn. Leikurinn var sá síðasti í þrjátíu og tveggja liða úrslitum bikarkeppni KSÍ. Víkingar frá Reykjavík spila í Pepsí deildinni og því um erfiðan andstæðing að ræða fyrir heimamenn.

Leikurinn var í járnum frá byrjun og heimamenn gáfu nöfnum sínum ekkert eftir. Liðin spiluðu fínan bolta og var hart barist. Það var svo á 43. mínútu, markamínútunni, að spánverjinn Gonzalo Zamorano Leon skoraði fyrir heimamenn með glæsilegu skoti sem reyndist óverjandi fyrir markvörð gestanna. Staðan í hálfleik var því 1-0 heimamönnum í vil. Í síðari hálfleik hélt sama baráttan áfram en gestirnir fóru að pressa stífar er líða tók á leikinn. Víkingar frá Ólafsvík féll aðeins aftar á völlinn og freistuðu þess að halda fengnum hlut og beita skyndisóknum. Þeir fengu nokkur ágæt tækifæri til að bæta við marki en gestirnir fengu einnig fín færi til að jafna metin. Þegar níutíu mínútur voru komnar á vallarklukkuna bættu dómararnir fimm mínútum í uppbótartíma fyrir tafir í leiknum og þegar tvær mínútur voru liðnar af þeim jöfnuðu gestirnir loks metin. Þar var að verki Helgi Guðjónsson en hann hafði áður komið inná sem varamaður. Við þetta þurfti að framlengja leikinn enda leikið til þrautar í bikarnum. James Dale fékk að líta sitt annað gula spjald á 102. mínútu og heimamenn því einum færri. Þeir færðu sig því enn aftar á völlinn og Víkingur Reykjavík sótti nánast látlaust það sem eftir lifði af framlengingunni. Hvorugu liðinu tókst þó að skora og því þurfti að grípa til vítaspyrnukeppni. Þegar bæði lið voru búin að taka fimm vítaspyrnur var staðan jöfn 4-4 þar sem bæði liðin misnotuðu eina spyrnu. Í sjöttu vítaspyrnu heimamanna fór boltinn yfir markið og því gátu gestirnir tryggt sæti sitt í 16 liða úrslitum með því að skora úr síðustu spyrnunni sem og þeir gerðu. Þeir fóru því kátir upp í rútu með farseðilinn í næstu umferð bikarkeppninnar en heimamenn sátu svekktir eftir. Þeir geta þó verið stoltir af frammistöðunni því að þeir gáfu bikarmeisturunum ekkert eftir og voru óheppnir að slá þá ekki úr keppni.

Víkingur Ólafsvík féll úr bikarnum fyrir nöfnum sínum