Það var líf og fjör á Akranesi klukkan 11 í morgun þegar skrúðganga með á annað þúsund ungum knattspyrnumönnum hélt af stað frá Stillholti og áleiðis á Jaðarsbakka. Norðurálsmótið er jafnan eitt stærsta pollamót ársins í knattspyrnu hér á landi og er að þessu sinni haldið í 35. skipti. Í ár fer mótið fram í tvennu lagi. Í gær var eins dags mót fyrir stráka og stelpur í 8. flokki en hefðbundið þriggja daga mót fyrir 7. flokk drengja hefst svo í dag og stendur yfir í þrjá daga. Ljósmyndarar Skessuhorns fylgdust með skrúðgöngunni og fylgja hér með myndir af flestum liðunum sem hefja nú keppni.

Keppt verður á 16 völlum á æfingasvæði knattspyrnufélags ÍA. Átta vallanna tilheyra svokölluðu suður-austurhólfi og jafnmargir í norður-vesturhólfi. Verða keppnissvæðin aðgreind með keilum og borða og fólk beðið að halda sig inni á sínum svæðum. Sökum fjöldatakmarkana vegna Covid-19 faraldursins mega að hámarki 500 fullorðnir vera í hvoru hólfi á hverjum tíma. „Bæjarbúum er velkomið að fylgjast með mótinu en eru beðnir um að hafa í huga þær fjöldatakmarkanir sem í gildi eru auk þess sem virða ber tveggja metra reglu eins og kostur er,“ segir í tilkynningu frá Geir Þorsteinssyni, framkvæmdastjóra KFÍA. Enn fremur verður kvöldvakan sem skipulögð hefur verið fyrir þátttakendur mótsins lokuð almenningi að þessu sinni, í skjóli aðstæðna.

Myndasyrpa – Norðurálsmótið hafið á Akranesi