Fyrir viku síðan var matarvagninn Caliber opnaður við íþróttahúsið á Jaðarsbökkum á Akranesi. það eru Jósef Halldór Þorgeirsson og Andri Sævar Reynisson sem eiga vagninn en þar er hægt að kaupa acai skálar. „Þetta eru skálar fylltar með berjagrunni sem við framleiðum sjálfir. Það er mjög gott jafnvægi milli þess sæta og súra, sem gerir skálarnar svona vinsælar. Acai skálin kemur með heimagerðu granóla og er svo toppað með banana, ferskum jarðarberjum og bláberjum. Svo geta viðskiptavinir toppað það með hnetusmjöri, granateplum, súkkulaði, chia fræjum, goji berjum eða kókosflögum,“ útskýrir Jósef.

Skyndihugmynd

Jósef útskrifaðist árið 2019 úr viðskipta- og hótelrekstrarfræði frá háskóla í Ástralíu og vann þar á fimm stjörnu hóteli áður en hann kom til Íslands og fór að vinna á Gamla kaupfélaginu á Akranesi, þar til leiðir skildu í vor. Andri Sævar er að læra hagfræði í háskólanum. Aðspurður segir Jósef hugmyndina að vagninum ekki gamla. „Þetta var í raun skyndihugmynd sem kviknaði í lok mars og nokkrum dögum síðar vorum við búnir að kaupa hestakerru sem við breyttum í matarvagn. Við höfum fengið mikla hjálp frá okkar nánasta fólki við að gera kerruna tilbúna fyrir þessa starfsemi,“ segir Jósef.

Byrja aðeins með acai skálar

Til að byrja með verða þeir aðeins með þessar skálar í boði en draumurinn segir Jósef vera að stækkað Caliber og jafnvel opna staðinn innandyra og vera með meira úrval. „Við ætlum að byrja á þessu og sjáum hvernig gengur í sumar áður en við förum að hugsa lengra,“ segir hann og bætir við að fyrstu viðbrögð hafi verið mjög góð. Það seldist upp bæði á föstudaginn, opnunardaginn, og á laugardaginn. En vagninn verður opinn virka daga frá klukkan 7-15 og laugardaga frá kl. 10-16 en lokað verður á sunnudögum. Þó verður opið á sunnudaginn næstkomandi vegna Norðurálsmótsins sem fram fer um helgina.

Matarvagninn Caliber opnaður á Akranesi