Virkjun var reist í Draghálsá án tilskilinna leyfa

Sveitarstjórn Hvalfjarðarsveitar hafnaði á síðasta fundi sínum tillögum að breytingu á aðalskipulagi sveitarfélagsins. Umhverfis-, skipulags- og náttúruverndarnefnd hafði áður komist að sömu niðurstöðu. Tillagan sem um ræðir nær til 37 hektara svæðis við bæinn Dragháls og í henni felst að því verði breytt í landbúnaðarsvæði í aðalskipulagi, en það er nú skilgreind sem opið svæði til sérstakra nota. Erindi málshefjanda, sem er eigandi jarðarinnar, til Hvalfjarðarsveitar er tvískipt. Þannig er annars vegar um að ræða framangreinda breytingu á opnu svæði til sérstakra nota í landbúnaðarsvæði í aðalskipulagi, en hins vegar tillaga að deiliskipulagi á hluta jarðarinnar sem samræmist aðalskipulagsbreytingartillögunni.

Heimild er í lögum fyrir vatnsaflsvirkjunum allt að 200 kW á skilgreindum landbúnaðarsvæðum, þó með undantekningum. Fjallað var um málið í Skessuhorni í lok janúar, þar sem fram kom að 8,3 kW vatnsaflsvirkjun hefði þegar verið reist í Draghálsá, án þess að heimild væri fyrir því í gildandi skipulagi sveitarfélagsins.

Fram kemur í fundargerð umhverfis-, skipulags- og náttúruverndarnefndar frá 2. júní að í efni beggja breytingatillagna komi fram að þær séu gerðar vegna „óleyfisframkvæmdar, þ.e. vatnsaflsvirkjunar sem þegar hefur verið reist í Draghálsá án lögboðinna leyfa,“ eins og segir í fundargerðinni. Af þeim sökum taldi nefndin að sveitarfélagið yrði að hafna báðum tillögunum. Sveitarfélagið geti ekki samþykkt skipulagsbreytingar sem gangi út á að festa umrædda framkvæmd í sessi. „Þannig væri hinu lögboðna ferli snúið við en slík framvinda mála myndi ganga gegn ákvæðum ýmissa laga er varði skipulags- og byggingarmál sem og umhverfis- og náttúrumál.“

Enn fremur taldi nefndin að ekki væri hægt að líta frá þeim neikvæðu umsögnum sem bárust um tillögurnar frá lögboðnum umsagnaraðilum. Því lagði hún til við sveitarstjórn að breytingartillögunum yrði hafnað. Einnig lagði nefndin til að skipulagsfulltrúa yrði falið að tilkynna framkvæmdina til Skipulagsstofnunar til ákvörðunar dagsekta vegna brota á lögum um mat á umhverfisáhrifum. Sveitarstjórn samþykkti samhljóða báðar þessar tillögur umhverfis-, skipulags- og náttúruverndarnefndar á fundi sínum 9. júní síðastliðinn.

Hafna því að breyta skipulaginu eftir á