Ársreikningur Stykkishólmsbæjar fyrir árið 2019 var tekinn til síðari umræðu á fundi sveitarstjórnar 4. júní síðastliðinn. Rekstrarniðurstaða ársins fyrir samstæðu A og B hluta var jákvæð um 80,5 milljónir króna á síðasta ári sem er nokkuð betri niðurstaða en búist var við, en gert hafði verið ráð fyrir 41 milljón króna í rekstrarafgang fyrir árið.

Rekstrartekjur sveitarfélagsins námu 1.720,8 milljónum króna á síðasta ári samkvæmt samanteknum ársreikning fyrir A og B hluta. Þar af námu rekstartekjur A hluta 1.343,4 milljónum. Rekstrargjöld A og B hluta námu 1.472,4 milljónum króna og þar af námu rekstargjöld A hluta 1.181,5 milljónum. Álagshlutfall útsvars var 14,52% og álagshlutfall fasteingaskatts í A flokki var 0,39% og í B flokki var álagshlutfallið 1,32%, sem er lögbundið hlutfall. Í C flokki var álagshlutfallið 1,57% en sveitarstjórnir hafa heimild til að hækka álagshlutfallið í A og C flokki um allt að 25%. „Útsvartekjur og fasteignagjöld gefa hærri tekjur sem nema um 4,1% sem helgast m.a. af fjölgun fasteigna og aukinna umsvifa atvinnurekenda í Stykkishólmi á síðasta ári,“ segir í bókun frá fundi bæjarstjórnar.

Veltufé frá rekstri samstæðunnar hækkaði frá 157,4 milljónum árið 2018 í 195,3 milljónir árið 2019 og handbært fé var 70,3 milljónir króna í lok síðasta árs. Hafnarsjóður var rekin með rekstarafgangi sem nemur u.þ.b. 19,2 milljónum króna og stafar það að mestu af aukinni umferð farþegaskipa, aflagjalda og annara umsvifa. Fráveita var rekin með 19 milljónum króna í rekstrarafgangi, sem er hækkun á milli ára. Rekstrarafgangur búsetu- og þjónustuíbúða er neikvæður um 0,8 milljónir króna og rekstarafkoma Dvalarheimilis aldraðra var neikvæð um 18,6 milljónir. Rekstarafkoma af félagslegum íbúðum var jákvæð um 19,6 milljónir króna, sem skýrist að stórum hluta af söluhagnaði Silfurgötu 18b.

Fram kemur í bókun frá fundi sveitarstjórnar að helstu fjárfestingar ársins voru við lóð Grunnskóla Stykkishólms og Amtbókasafnsins en námu þær fjárfestingar 68,9 milljónum króna. Þá voru notaðar 34,5 milljónir króna í framkvæmdir við gangstéttar, stígagerð og ýmsar endurbætur á gatnamannvikjum ásamt deiliskipulagsvinnu. Lagfæring á Íþróttamiðstöðinni kostaði 7,7 milljónir króna og endurbætur á Þjónustumiðstöð Stykkishólmsbæjar kostaði 4,4 milljónum króna. Þá kostaði ljósleiðaravæðing stofnanna bæjarins 6,2 milljónir.

Skuldir A og B hluta við lánastofnanir nema 1.786,2 milljónir króna og þar af langtímalán að fjárhæð 1.623,1 milljón og næsta árs afborganir langtímalána eru 163 milljónir króna. Þar af nema skuldir A hluta 1.440,4 milljónir. Þá kemur fram að langtímaskuldir hafi lækkað á síðasta ári, en afborganir af lánum á síðasta ári námu 173 milljónum og ný lán á árinu námu 103 milljónir króna. Skuldaviðmið A og B hluta árið 2019 er 112% en var 120% árið 2018. Skuldahlutfall A og B hluta var 137% á síðasta ári en 144% árið á undan. „Samkvæmt framangreindu er ljóst að fjárhagstaða Stykkishólmsbæjar í árslok 2019 er vel innan þeirra fjárhagslegu viðmiða sem sveitarstjórnarlög og reglugerðir þeim tengdum kveða á um, en þau viðmið leggja þær kvaðir á sveitarfélög að standast jafnvægisreglu og skuldareglu sveitarstjórnarlaga,“ segir í bókuninni frá fundi sveitarstjórnar.

Jákvæð rekstarniðurstaða í Stykkishólmi