Síðar í sumar koma 25 nýir sjúkrabílar af Mercedes Benz gerð á götur landsins. Frá því er greint á heimasíðu Rauða kross Íslands að RKÍ muni eiga og reka bílana, líkt og síðustu 90 árin. Þessa dagana er verið að vinna við framleiðslu bílanna og merkingar þeirra. Þeir verða með nýju útliti, en svokölluð Battenburg merking verður á þeim. Slíkum merkingum er ætlað að auka sýnileika bifreiðanna enn frekar í umferðinni.

Að sögn Gísla Björnssonar deildarstjóra sjúkraflutninga hjá Heilbrigðisstofnun Vesturlands hefur ekki verið tekin ákvörðun um hvernig þessum 25 fyrstu nýju bílum RKÍ verður skipt niður á landið. Hann segir að fyrirliggjandi þörf á starfssvæði HVE séu sex nýir bílar, en á þó ekki von á að sá fjöldi fáist nú í fyrstu umferð. Til hefur staðið að bjóða út kaup á 25 sjúkrabílum til viðbótar, en af því hefur ekki enn orðið. Gísli segir uppsafnaða þörf mikla fyrir endurnýjun sjúkrabílaflotans í landinu.

Hér má sjá nokkrar myndir af bílunum.

Nýtt útlit verður á nýjustu sjúkrabílunum