Ársþing Íþróttabandalags Akraness var haldið í 76. skiptið mánudagskvöldið 8. júní síðastliðið. Í ársskýrslu ÍA, sem lögð var fram á fundinum, kemur fram að bandalagið hafi verið rekið með lítilsháttar tapi á liðnu ári. Rekstrar- og vaxtatekjur námu rúmum 45,5 milljónum króna og rekstrargjöld tæpum 46,9 milljónum króna. Að meðtöltum fjármagnsliðum og afskriftum varð 1,3 milljónar króna tap á rekstrinum, en gert hafði verið ráð fyrir því í áætlun að ganga á höfuðstól bandalagsins. Framlög til aðildarfélaga voru hækkuð milli ára og námu 21,5 milljón á síðasta ári. Eigið fé ÍA var rúmar 74 milljónir króna í árslok 2019 og hækkar talsvert milli ára og skýrist það einkum af hækkuðu fasteignamati. Stærstu eignir ÍA eru peningalegar eignir og einarhlutur í íþróttamiðstöðinni að Jaðarsbökkum.

Þær breytingar urðu á stjórn ÍA að Dýrfinna Torfadóttir, Tjörvi Guðjónsson og Svava Huld Þórðardóttir gáfu ekki kost á sér til setu í aðalstjórn áfram. Hallbera Jóhannesdóttir gaf ekki kost á sér til áframhaldandi setu í varastjórn. Gísli Karlsson var valinn í aðalstjórn, en hann hafði áður setið í varastjórn, auk Hrannar Ríkarðsdóttur og Lífar Lárusdóttur. Ný í varastjórn voru kjörin Erla Lárusdóttir og Trausti Gylfason. Marella Steinsdóttir var endurkjörin formaður ÍA og Hörður Ó. Helgason varaformaður.

Heiðruð fyrir störf sín

Tólf var veitt Bandalagsmerki ÍA fyrir störf sín í þágu íþróttahreyfingarinnar á Akranesi. Þau eru: Ása Hólmarsdóttir, Brandur Sigurjónsson, Brynjar Sigurðsson, Haraldur Ingólfsson, Hjördís Hjartardóttir, Ingunn Ríkharðsdóttir, Ólafur Ingi Guðmundsson, Óskar Arnórsson, Steindóra Steinsdóttir, Svava Hrund Guðjónsdóttir, Þóranna Halldórsdóttir og Þórður Elíasson.

Þá tók Hafsteinn Pálsson, annar varaforseti ÍSÍ, til máls á þinginu og veitti ÍA viðurkenningu sem Fyrirmyndarhérað ÍSÍ, en sú viðurkenning er veitt fyrir fyrirmyndarstarf íþróttahéraða. Auður Inga Þorsteinsdóttir, framkvæmdastjóri UMFÍ, flutti ræðu og bauð ÍA velkomið í UMFÍ. Sævar Freyr Þráinsson bæjarstjóri fór yfir framkvæmdir á íþróttamannvirkjum bæjarins og ræddi um samstarf íþróttahreyfingarinnar og sveitarfélagsins varðandi greiningu á stöðu málaflokksins á Akranesi. Sagði hann frá vinnu starfshóps sem skipaður er fulltrúum Akraneskaupstaðar og ÍA um fjárhagsstuðning kaupstaðarins til handa íþróttabandalaginu. Sagði hann að niðurstaða þeirrar vinnu myndi liggja fyrir innan tíðar.

Þá tóku forsvarsmenn nokkurra íþróttafélaga til máls á fundinum og ræddu um ýmis málefni sem tengjast íþróttahreyfingunni. Almennt voru fundarmenn bjartsýnir á framhaldið að loknum erfiðum vetri.

Ársþing ÍA var haldið í 76. skipti