Stofnvísitala þorsks er um 6% lægri en síðastliðin þrjú ár, en hún hefur verið há frá árinu 2011 eftir að hafa verið í lágmarki frá 2002-2006. Rekja má lækkun stofnvísitölunnar til þess að árgangur sjö ára þorsks er lítill og minna fékkst af átta ára fiski, að því er fram kemur í niðurstöðum netaralls Hafró. Stofnvísitala þorsks lækkar milli ára á flestum svæðum, en hækkar töluvert milli ára við Suðvesturland. Þar var hún óvenju lág í fyrra og lægri árin á undan. Kanturinn fyrir austan Vestmannaeyjar sker sig úr og lítið fæst nú af þorski þar.

Síðastliðinn áratug hefur vægi hrygningarsvæðanna í Faxaflóa og Breiðafirði í stofnvísitölu hrygningarþorsks aukist, en hækkun vísitölunnar frá 2011 má að stórum hluta rekja til þeirra svæða. Undanfarinn áratug hefur sömuleiðis orðið aukning á hrygningu þorsks furir suðaustan og norðan landið. Ágætt samræmi er á þróun stofnvísitalna þorsks með þorskanetum og stofnmælingum með botnvörpu.

Ástand þorsks er um eða undir meðaltali, en talsverður breytileiki er þó á milli svæða, aldurs og lengdarflokka. Verulegar breytingar hafa orðið á vaxtarhraða þorsksins á rannsóknartímanum. Hann hefur aukist við vestanvert landið og fyrir norðan, en dregið hefur úr honum aftur síðustu ár. Vaxtarhraði þorsks við Suðausturland var hár í byrjun, fór svo lækkandi en hefur aukist lítllega aftur. Kynþroskahlutfall eftir aldri breytist lítið hjá algengustu aldurshópunum milli ára.

Mikið af ufsa

Stofnvísitala ufsa í netaralli mældist há eins og verið hefur frá 2016. Hún er þó lægri en í fyrra, þegar hún var sú hæsta frá því mælingar hófust árið 2002. Hækkun stofnvísitölu 2019 má rekja til mikillar aukningar á ufsa í Fjörunni og á Bankanum, en minni breytingar mældust á öðrum svæðum. Mest mældist af sjö til ellefu ára gömlum ufsa í netarallinu.

Hvað varðar aðrar tegundir er helst að nefna að vísitala lúðu í Faxaflóa og Breiðafirði hefur hækkað hratt síðustu ár og vísitölur hrognkelsis og skarkola mældust með þeim hærri frá 1996, einkum vegna mikils afla í Breiðafirði. Hins vegar hefur skötuselurinn nánast horfið úr Breiðafirði og Faxaflóa, en hann var algengur þar frá 1999-2012.

Stofnvísitala þorsks lækkar lítillega