Nýlega var auglýstur breyttur afgreiðslutími í útibúum Arion banka á Vesturlandi, sem tók gildi 12. maí síðastliðinn. Þar kemur fram að í Búðardal verði opið frá 10-14 þriðjudaga og miðvikudaga og en alla virka daga frá 12:30-16 í Borgarnesi og Stykkishólmi. Áður en samkomubann tók gildi var opið alla virka daga frá kl. 9-16 í Borgarnesi, 9-15 í Stykkishólmi og frá 10-14 í Búðardal.

Að sögn Sigurgeirs Sindra Sigurgeirssonar, svæðisstjóra Arion banka á Vesturlandi, er gert ráð fyrir að hefðbundinn afgreiðslutími taki við að nýju í útibúinu í Borgarnesi þegar létt verður á samkomubanni. Nýr opnunartími er hins vegar kominn til að vera í Stykkishólmi og Búðardal. En af hverju er verið að breyta opnunartíma útibúa? „Heilt yfir hefur eftirspurn eftir þjónustu sem veitt er í útibúum bankans minnkað með tilkomu sífellt betri stafrænna lausna. Fólk kýs í auknum mæli að nýta appið, vefinn og netbankann, sem og þjónustuverið, enda er hægt að sinna nær öllu sem tengist fjármálum með þægilegum hætti í gegnum þessar þjónustuleiðir,“ segir Sindri í samtali við Skessuhorn. „Eðlilega höfum við aðlagað okkar þjónustu að þessum nýja raunveruleika og fækkað útibúum bankans og breytt afgreiðslutíma bæði á höfuðborgarsvæðinu og landsbyggðinni,“ segir hann. „Þegar kemur að því að meta þörfina á útibúi eða afgreiðslutíma á hverjum stað fyrir sig tökum við meðal annars tillit til eftirspurnar á svæðinu en einnig samfélagslegra þátta eins og aðgengi að bankaþjónustu í nágrenninu. Eftirspurn víða um land stendur ekki undir fullum afgreiðslutíma alla virka daga og því höfum við ákveðið að stytta afgreiðslutíma víða, þar með talið á Vesturlandi,“ bætir hann við.

Aðspurður segir svæðisstjórinn að breyttur opnunartími komi ekki til með að hafa áhrif á starfshlutfall starfsfólks. „Starfsmenn munu sinna öðrum verkefnum á sínum starfsstöðvum, til dæmis að svara í síma í þjónustuveri bankans,“ segir Sindri að endingu.

Breyttur afgreiðslutími Arion banka í landshlutanum